కె.ఎ.పాల్ అంటే, తెలుగు రాష్ట్రాల్లో ఎవరికీ ప్రత్యేకంగా పరిచయం చేయాల్సిన అవసరం లేదు. ది మోస్ట్ పాపులర్ సెలబ్రిటీగా కిలారి ఆనంద్ పాల్ అందరికీ సుపరిచితుడు. ఇప్పుడంటే కామెడీ అయిపోయాడుగానీ, ఒకప్పుడు క్రైస్తవ మత ప్రదోభదకుడిగా ఈయన సాధించిన పేరు ప్రఖ్యాతులు అన్నీ ఇన్నీ కావు. తెలుగు నేల మీదనే కాదు, కేఏ పాల్ పేరు ప్రఖ్యాతులు దేశమంతటా ఆ మాటకొస్తే ప్రపంచమంతటా విస్తరించాయి.
ఏమయ్యిందోగానీ, అనూహ్యంగా కేఏ పాల్ జస్ట్ ఓ గల్లీ లీడర్గా మారిపోయాడు. ఇదంతా ఆయన స్వయంకృతాపరాధమే. సోదరుడి మిస్టరీ డెత్ దగ్గర్నుంచి, ఆయన సంపాదించుకున్న ఆస్తులు వివాదాల్లోకెక్కడం సహా చాలా వ్యవహారాలు నడిచాయి. 2009లో ఓసారి, 2019లో ఓ సారి రాజకీయ తెరపై హల్చల్ చేసిన కేఏ పాల్, తెలుగు రాష్ట్రాల్లోని ప్రజలకు బోల్డంత వినోదాన్ని పండించాడు. ఈ పాల్, ఇప్పుడు ‘కమ్మ రాజ్యంలో కడప రెడ్లు’ సినిమాతో హల్చల్ చేయబోతున్నాడు.
అయితే, ఈ సినిమాలో ఆయన నటించడంలేదు.. ఆయన పాత్ర మాత్రం సినిమాలో వుంటుంది. దీనికి సంబంధించి వర్మ రేపు ఓ పాట విడుదల చేయబోతున్నాడట. కేఏ పాల్ – వర్మ మధ్య డిఫరెంట్ బాల్ గేమ్ నడిచింది ఆ మధ్య. వర్మ తన కాళ్ళు మొక్కాడని పాల్.. కాదు కాదు, తన వద్దకు సినిమా తీయాలని పాల్ వచ్చాడని వర్మ.. ఏవేవో చెప్పారు ఎన్నికల సమయంలో.
అన్నట్టు, ఎవర్నో పాపులర్ చేయడానికి ‘క్రైస్తవ’ మత ప్రచార వేదికలపై కిలారి ఆనంద్ పాల్ ఇమేజ్ని తగ్గించేశారనే అభిప్రాయం తెలుగునాట బలంగా వుందండోయ్. ఆ కథా కమామిషు ఏమైనా వర్మ, తన ‘కమ్మ రాజ్యంలో కడప రెడ్లు’ సినిమాలో చూపించగలడా? వేచి చూడాలిక.