జగన్ విషయంలో రాయిటర్స్ రూటు మారింది

కియా పరిశ్రమ తరలిపోతోందంటూ సంచలన కథనం రాసి ఏపీలో కలకలానికి కారణమైన ప్రముఖ వార్తా సంస్థ రాయిటర్స్.. ఏపీ సీఎం జగన్ విషయంలో తన వైఖరి మార్చుకున్నట్టు కనిపిస్తోంది. జగన్ ప్రతిపాదించిన మూడు రాజధానుల మోడల్ మంచిదేనంటూ ఓ కథనం ప్రచురించింది. మూడు రాజధానుల అంశాన్ని ప్రధాన మీడియా అంతా వ్యతిరేకిస్తున్న తరుణంలో రాయిటర్స్ కథనం జగన్ సర్కారుకు ఊరటగానే చెప్పొచ్చు.

నగరీకరణ పెరుగుతుండటం.. పల్లెల నుంచి రాజధాని ప్రాంతానికి వలసలు ఎక్కువవుతున్న నేపథ్యంలో అక్కడ ఉత్పన్నమయ్యే సమస్యలు మూడు రాజధానుల కారణంగా తగ్గుతాయని రాయిటర్స్ తన కథనంలో పేర్కొంది. జగన్ ప్రతిపాదనను సమర్థిస్తూ ఆ కథనాన్ని ప్రచురించింది. మరి దీని వెనుక జగన్ మీడియా సలహాదారులు ఏమైనా కసరత్తు చేశారా? లేక రాయిటర్సే సొంతంగా ఆ కథనం రాసిందా అనేది తెలియలేదు.

నిజానికి కియా పరిశ్రమ ఏపీ నుంచి తమిళనాడుకు తరలిపోతోందంటూ రాయిటర్స్ లో వచ్చిన కథనం సంచలనం సృష్టించింది. దాని ఆధారంగా తెలుగుదేశం అనుకూల మీడియా జగన్ కు వ్యతిరేకంగా కథనాలు గుప్పించింది. ఇక టీడీపీ నేతలు ఒక్కసారిగా జగన్ పై విరుచుకుపడ్డారు. ఒక్క పరిశ్రమ కూడా తీసుకురాలేని జగన్.. తాము తీసుకొచ్చిన పరిశ్రమలను సైతం వెళ్లిపోయేలా చేస్తున్నారని మండిపడ్డారు. దీంతో ఇదంతా తప్పని అటు ప్రభుత్వం, ఇటు కియా సంస్థ చెప్పినప్పటికీ రాష్ట్ర ప్రభుత్వానికి జరగాల్సిన నష్టం జరిగిపోయింది. దీంతో రాయిటర్స్ కు, టీడీపీ అధినేత చంద్రబాబుకు మధ్య ఉన్న సంబంధాన్ని వైసీపీ బట్టబయలు చేసింది.

గత ప్రభుత్వ హయాంలో ప్రభుత్వం నుంచి రాయిటర్స్ సంస్థ లబ్ధి పొందిందని, ఈ నేపథ్యంలో ఆ రుణం తీర్చుకునేందుకే ఇలాంటి అసత్య కథనం వండి వార్చిందని వైసీపీ నేతలు దుయ్యబట్టారు. అనంతరం ఈ వివాదం సద్దుమణిగింది. ఈ నేపథ్యంలో తాజాగా జగన్ సర్కారుకు అనుకూలంగా రాయిటర్స్ లో కథనం రావడం టీడీపీ వర్గాలను ఆశ్చర్యానికి గురి చేసింది.