ఆయన పేరు ఎం నాగేశ్వరరావు. గతంలో ఆయన సీబీఐ డైరెక్టర్గా కూడా పని చేశారు. ప్రస్తుతం రిటైర్డ్ ఐపీఎస్ మాత్రమే.! సోషల్ మీడియా వేదికగా యాక్టివ్గా వుంటుంటారు, చాలా అంశాలపై తన అభిప్రాయాల్ని కుండబద్దలుగొడుతుంటారు. తరచూ, పబ్లిసిటీ స్టంట్లు కూడా చేస్తుంటారాయన. రీచ్ కోసం పడే కష్టాలు కావొచ్చన్న వాదన లేకపోలేదనుకోండి.. అది వేరే సంగతి.
ఈ రిటైర్డ్ ఐపీఎస్ తాజాగా, ఏపీ మంత్రి నారా లోకేష్ మీద కొన్ని ఆరోపణలు చేస్తూ, సుదీర్ఘమైన పోస్ట్ సోషల్ మీడియాలో పెట్టారు. లోకేష్ మీద ఎందుకు ఆయన ఆరోపణలు చేయాల్సి వచ్చింది.? అన్నదే ఇప్పుడు హాట్ టాపిక్. పైగా, మాజీ ముఖ్యమంత్రి వైఎస్ జగన్ మోహన్ రెడ్డితో, ఏపీ మంత్రి నారా లోకేష్ని పోల్చుతూ, అవినీతి ఆరోపణలు కూడా చేశారు రిటైర్డ్ ఐపీఎస్ నాగేశ్వరరావు.
వైఎస్ జగన్ మోహన్ రెడ్డికి అత్యంత విలాసవంతమైన ప్యాలెస్సులు వున్నాయన్నది అందరికీ తెలిసిన విషయమే. అలాంటి ప్యాలెస్సులే, నారా లోకేష్ కూడా కట్టుకుంటున్నారన్నది నాగేశ్వరరావు ఆరోపణ.
హైద్రాబాద్లో చంద్రబాబు కుటుంబానికి ఓ ఇల్లు వుంది. అమరావతిలో లేదు. సొంత నియోజకవర్గం కుప్పంలో చంద్రబాబుకి ఇల్లుంది. చంద్రబాబు, లోకేష్ కలిసే వుంటారు కాబట్టి.. ఇద్దరినీ విడివిడిగా ప్రస్తావించడం సబబు కాదేమో, సొంతిల్లు విషయంలో.
అమరావతిలో ఇల్లు కట్టుకునే దిశగా ఇప్పటికే నిర్ణయం తీసుకున్న చంద్రబాబు, లోకేష్.. ఇంటి నిర్మాణ పనులు మొన్నామధ్యన ప్రారంభించారు. అది తప్పేమీ కాదు కదా.! వైఎస్ జగన్ మోహన్ రెడ్డి వ్యవహారం వేరు, ఆయన ప్యాలెస్సుల కథ వేరు.
ఇక, అవినీతి ఆరోపణలతో వైసీపీకి చెందిన ముఖ్య నాయకులెవర్నీ జైల్లో వెయ్యలేదంటూ, నారా లోకేష్ మీద అనుమానాలు వ్యక్తం చేశారు రిటైర్డ్ ఐపీఎస్ నాగేశ్వరరావు. కానీ, ఇప్పటికే చాలామంది వైసీపీ ముఖ్య నేతలు అరెస్టయ్యారు, కొందరు జైళ్జలో వున్నారు కూడా.
రాజకీయంగా బలపడే క్రమంలో, కేంద్రంలోని బీజేపీతో నారా లోకేష్ సన్నిహిత సంబంధాలు పెంచుకుంటున్నారనీ, ఏపీలో ప్రభుత్వం మారినా, తనకు రక్షణ కవచాల్ని ఇప్పటి నుంచే సిద్ధం చేసుకుంటున్నారనీ నాగేశ్వరరావు ఆరోపణలు చేశారు.
మొత్తం నాగేశ్వరరావు ట్వీటు కథనంలో, నారా లోకేష్ మీద అక్కసు తప్ప, వైఎస్ జగన్ మోహన్ రెడ్డితో నారా లోకేష్ని పోల్చడంలో అర్థమే లేదన్నది సుస్పష్టమవుతోంది. అయితే, ఈ కథనం వెనుక కుట్ర కోణమేంటి.? అన్నదానిపై భిన్న వాదనలున్నాయి.
కేంద్రంలోని బీజేపీ వాసన కూడా పడటం లేదు రిటైర్డ్ ఐపీఎస్ నాగేశ్వరరావుకి. టీడీపీ మీద, అందునా లోకేష్ మీద కూడా ఏదో తెలియని ద్వేషం ఆయనతో ఈ సోషల్ కథనాన్ని వండి వడ్డించేలా చేసిందేమో.!