అంబేద్కర్ జిల్లా వెనుక అంత పెద్ద కథ వుందట.!

కోనసీమ జిల్లా కాస్తా అంబేద్కర్ జిల్లాగా మారబోతోంది. 13 జిల్లాల ఆంధ్రప్రదేశ్ రాష్ట్రాన్ని 26 జిల్లాలుగా ఇటీవల వైఎస్ జగన్ సర్కారు మార్చిన విషయం విదితమే. కోనసీమ ప్రజల చిరకాల కోరిక ప్రత్యేక జిల్లా.! ఆ ‘కోనసీమ’ గుర్తింపు కొద్ద రోజుల్లో కనుమరుగు కాబోతోందన్న ఆవేదన కోనసీమ ప్రాంత ప్రజల్లో కనిపిస్తోంది.

కొత్త జిల్లాల విభజనతో కోనసీమ వాసుల కల నెరవేరినా, ఆ ఆనందం ఎక్కువ రోజులు నిలవలేదు. ‘మాది కోనసీమ..’ అని చెప్పుకోవడానికి వీల్లేని పరిస్థితి వస్తోందంటూ కోనసీమ జిల్లా వాసులు కొందరు వాపోతున్నారు. కోనసీమ జిల్లాకి అంబేద్కర్ పేరు పెట్టాలనీ, బాలయోగి పేరు పెట్టాలనీ చాలాకాలంగా డిమాండ్లు వస్తున్నమాట వాస్తవం.

‘కోనసీమ బాలయోగి.. కోనసీమ అంబేద్కర్..’ ఇలా పేర్లు పెడితే పెద్దగా అభ్యంతరం వుండదేమో.! ప్రస్తుతానికి కోనసీమగా వున్న ఈ జిల్లా పేరుని మార్చి, ‘కోనసీమ అంబేద్కర్..’ లేదా, అంబేద్కర్ కోనసీమ జిల్లాగా పేరు మార్చినా ఆశ్చర్యపోవాల్సిన పనిలేదు.

అయినా, రాష్ట్రంలో 26 జిల్లాలు వుండగా, ఒక్క కోనసీమ జిల్లాకే అంబేద్కర్ పేరు పెట్టాలనే డిమాండ్ రావడమేంటి.? ఇది కాస్త ఆలోచించాల్సిన విషయమే. రాజకీయంగా రాష్ట్రంలో అత్యంత కీలకమైన ప్రాంతాల్లో కోనసీమ ఒకటి. అందుకే, ఇక్కడ అధికార వైసీపీ అత్యంత వ్యూహాత్మకంగా ‘పేరు’తో రాజకీయాలు చేస్తోందన్నది ప్రధానంగా వినిపిస్తోన్న విమర్శ.

ఒక్క సంక్షేమ పథకానికి కూడా అంబేద్కర్ పేరు పెట్టలేదుగానీ, జిల్లాలకు అంబేద్కర్ పేరు పెట్టి, ఏం సందేశాన్ని పంపిస్తున్నట్లు.? అన్న విమర్శ కూడా లేకపోలేదు. వైఎస్సార్ పేరుతో జిల్లా వుంది, కొన్ని సంక్షేమ పథకాలకీ ఆ పేరు వుంది. అల్లూరి పేరుని ఓ జిల్లాకి పెట్టారు.. ఎన్టీయార్ పేరుని కూడా ఓ జిల్లాకి పెట్టారు. మరి, అలా సంక్షేమ పథకాలకు ఆయా పేర్లు ఎందుకు పెట్టడంలేదన్న చర్చ మొదలైందిప్పుడు.

రాజకీయం అంటేనే అంత.! కోనసీమ అంబేద్కర్ పేరు పెట్టడం ద్వారా దళితులకి సముచిత గౌరవం ఇచ్చామనో, అంబేద్కర్‌ని గౌరవించేశామని చెప్పడం ద్వారా దళిత ఓటు బ్యాంకుని క్యాష్ చేసుకోవడమే ప్రధాన అజెండా