పరకామణి కేసులో నిందితుడిగా నిలిచిన రవి కుమార్ పేరు మరోసారి వార్తల్లోకి వచ్చింది. ఇటీవల ప్రెస్ మీట్లో సీఎం జగన్ “ఇది చిన్న చోరీ మాత్రమే” అని వ్యాఖ్యానించగా, ఆ మాటలపై రవి కుమార్ స్పందించిన వీడియో ఇప్పుడు సోషల్ మీడియాలో సంచలనం సృష్టిస్తోంది. జగన్ చెప్పినట్టు ఇది చిన్న తప్పు కాదని, తాను జీవితంలో చేసిన అత్యంత పెద్ద పాపమిదే అని రవి కుమార్ కెమెరా ముందే కన్నీరుమున్నీరయ్యాడు. తన తప్పు చిన్నది కాదని, తనకు జీవితాంతం మిగిలిపోయే బాధ ఇదేనని చెప్పుకుంటూ రవి కుమార్ రోదించిన వీడియో చూస్తున్న వారిని కూడా కలచివేస్తోంది.
వీడియోలో ఆయన “జగన్ గారు చిన్న చోరీ అన్నారు… కానీ నాకు అది చిన్నది కాదు. నేను ఎంతో పెద్ద తప్పు చేశాను. చేసిన పనికి నేను నేనే శిక్ష అనుభవిస్తున్నాను” అంటూ భావోద్వేగానికి గురయ్యాడు. ఈ మాటలు బయటకు రావడంతో రాజకీయ వర్గాల్లో చర్చలు మరింత వేడెక్కాయి. కొందరు రవి కుమార్ నిజంగా పశ్చాత్తాపంతో మాట్లాడుతున్నాడని అనుకుంటే, మరికొందరు ఇది కొత్త రాజకీయ మలుపు అని అభిప్రాయపడుతున్నారు. అయితే వీడియో విడుదల కావడంతో ప్రజల్లో ఆసక్తి పెరిగి ఆన్లైన్లో వీక్షణలు భారీగా పెరిగాయి.
జగన్ వ్యాఖ్యలు, రవి కుమార్ ప్రతిస్పందన రెండు ఒకేసారి వైరల్ కావడంతో పరకామణి కేసు మరోసారి ప్రధాన చర్చాంశంగా మారింది. ఈ వీడియో సోషల్ మీడియాలో పెద్ద ఎత్తున షేర్ అవుతుండగా, రాజకీయ వేడి తక్కువయ్యే సూచనలు కనిపించడం లేదు. ఈ సంఘటనపై వచ్చే రోజుల్లో ఇంకా ఎన్ని మలుపులు తిరుగుతుందో అన్న ఆసక్తి పెరుగుతోంది.