రాజస్థాన్ రగడ: పైలట్ దారెటు?

రాజస్థాన్ లో రాజకీయ రగడ మరింత ముదిరింది. ముఖ్యమంత్రి అశోక్ గెహ్లాట్, ఉప ముఖ్యమంత్రి సచిన్ పైలట్ మధ్య కొనసాగుతున్న విభేదాలు తీవ్రరూపం దాల్చాయి. ఇరువురూ తమ తమ బల ప్రదర్శనలు ఏర్పాటు చేసేలా ప్రయత్నాలు జరుగుతున్నాయి. తనకు 30 మంది ఎమ్మెల్యేల మద్దతు ఉందని పైలట్ చెబుతుండగా.. తమకు వందకు పైగా ఎమ్మెల్యేల బలం ఉందని గెహ్లాట్ వర్గం చెబుతోంది. వీరిలో 90 మంది కాంగ్రెస్ ఎమ్మెల్యేలు కాగా, మరో పది మంది స్వతంత్రులు ఉన్నారని సమచారం.

రణ్ దీప్ చెప్పిందే నిజమైతే.. పైలట్ వెంట 30 మంది ఎమ్మెల్యేలు లేరని తెలుస్తోంది. సోమవారం గెహ్లాట్ ఇంట సీఎల్పీ సమావేశం ప్రారంభమైంది. దీనికి హాజరు కావాలంటూ కాంగ్రెస్ ఎమ్మెల్యేలకు విప్ కూడా జారీచేశారు. 200 మంది సభ్యుల గల రాజస్థాన్ అసెంబ్లీలో మ్యాజిక్ ఫిగర్ 101. ప్రస్తుతం మిత్రపక్షాలు, స్వతంత్రులతో కలసి కాంగ్రెస్ కు 124 మంది ఉండగా.. బీజేపీ కూటమికి 76 మంది ఉన్నారు. పైలట్ చెప్పినట్టు ఆయనకు 30 మంది సభ్యుల బలం ఉండి, బీజేపీతో చేతులు కలిపితే గెహ్లాట్ సర్కారు కూలిపోవడం ఖాయం. కానీ ఆ పరిస్థితి రానివ్వబోమన్నది కాంగ్రెస్ ధీమాగా చెబుతున్న మాట.

ఇప్పుడున్న పరిస్థితుల్లో పైలట్ తో కలిసి బీజేపీ ప్రభుత్వం ఏర్పడాలంటే కనీసం 25 మంది సభ్యుల మద్దతు అదనంగా కావాలి. కానీ తాను బీజేపీతో కలిసి వెళ్లబోనని సచిన్ పైలట్ వ్యాఖ్యానించడం ప్రాధాన్యత సంతరించుకుంది.

మరోవైపు రాజస్థాన్ లో రాజకీయ సంక్షోభం కొనసాగుతండగా.. ఐటీ దాడులు కలకలం సృష్టించాయి. సీఎం గెహ్లాట్ కు అత్యంత సన్నిహితులైన ఇద్దరు వ్యక్తులపై సోమవారం పలు ప్రాంతాల్లో ఐటీ అధికారులు దాడులు చేశారు. ఇదంతా బీజేపీ కుట్ర అని, తమ ప్రభుత్వాన్ని అస్థిరపరిచేందుకు ప్రయత్నాలు చేస్తోందని కాంగ్రెస్ నేత రణ్ దీప్ సూర్జేవాలా ధ్వజమెత్తారు. మొత్తానికి అటు రాజకీయ నేతల పోటాపోటీ భేటీలు.. ఇటు ఐటీ దాడులు వెరసి రాజస్థాన్ రాజకీయాలు హాట్ హాట్ గా మారాయి. ఈ క్రమంలో అసలు సచిన్ పైలట్ దారి ఎటు అన్నది స్పష్టత లేదు. బీజేపీతో చేతులు కలిపేది లేదని చెప్పినందున.. పార్టీలో ఉంటూనే సీఎం పీఠం కోసం ప్రయత్నాలు చేస్తారా అన్నది తెలియాలంటే రెండు మూడు రోజులు వేచి చూడాల్సిందే.