పవర్ ప్లే మూవీ రివ్యూ – చూసిన ప్రతి ఒక్కరూ పక్కా డకౌట్.

ఒరేయ్ బుజ్జిగా లాంటి ఎంటర్టైనర్ తర్వాత యంగ్ హీరో రాజ్ తరుణ్ – డైరెక్టర్ విజయ్ కుమార్ కొండా ట్రై చేసి థ్రిల్లర్ మూవీ ‘పవర్ ప్లే’.  అతి తక్కువ టైం లో తీసిన ఈ సినిమాలో హేమల్, పూర్ణ, అజయ్ లు ప్రధాన పాత్రలు పోషించారు. చాలా కాలంగా హిట్ కోసం ఎదురుచూస్తున్న రాజ్ తరుణ్ లవ్ అండ్ కామెడీ స్టోరీలని పక్కన పెట్టి చేసిన ఈ థ్రిల్లర్ మూవీ అయినా కోరుకున్న హిట్ ఇచ్చిందో లేదో ఇప్పుడు చూద్దాం..

కథ:

ఒక గ్యాంగ్ ఎవరికీ తెలియకుండా ఎటిఎంలలో ఒరిజినల్ నోట్లు దొంగతనం చేసి డూప్లికేట్ నోట్స్ పెడుతుంటారు. అలా ఓ రోజు ఎటిఎం నుంచి తెలియక దొంగ నోట్స్ డ్రా చేసుకొని పార్టీ ఇచ్చిన విజయ్ ని (రాజ్ తరుణ్) పోలీసులు అరెస్ట్ చేస్తారు. ఆ పోలీస్ కేసు వల్ల ప్రేమించి పెళ్లి చేసుకోబోతున్న అమ్మాయితో పెళ్లి కాన్సల్ అవుతుంది. విజయ్ లైఫ్ రోడ్ మీదకి వచ్చేస్తుంది. ఎలా అయినా విజయ్ తను అమాయకుడు అని ప్రూవ్ చేసుకోవడం కోసం ఆ ఎటిఎం దగ్గర వెతకగా ఎదురుగా ఉన్న ఒక మెకానిక్ షాప్ లో సిసి టీవీ ఉంటుంది. కానీ ఓనర్ సిసి టీవీ ఫుటేజ్ ఇవ్వను అంటాడు. ఇక అక్కడి నుంచీ ఆ సీసీటీవీ ఫుటేజ్ కోసం విజయ్ పడ్డ కష్టాలేమిటి? సీసీటీవీ ఫుటేజ్ చూసిన ఆ మెకానిక్ షాప్ ఓనర్ ఏకంగా కాబోయే సీఎం పూర్ణ(పూర్ణ)ని ఎందుకు బ్లాక్ మెయిల్ చేసి డబ్బులు అడుగుతాడు.? అటు విజయ్ నిర్దోషిగా నిరూపించుకోగలిగాడా? లేదా? పూర్ణ భయపడేంతలా ఆ ఫుటేజ్ లో ఏముంది? ఎటిఎం లలో దొంగనోట్లు పెడుతున్న ముఠా ఎవరు అనేదే కథ.

తెరమీద స్టార్స్..

ఇప్పటివరకూ ఎంటర్టైంగ్ పాత్రల్లో కనిపించిన రాజ్ తరుణ్ మొదటి సారి థ్రిల్లర్ సినిమాలో కనిపించాడు. టెన్షన్, బాధ, కోపం లా అన్నీ కలగలిపిన పాత్రలో బాగా చేసాడు. పూర్ణ ఓ ముఖ్యమంత్రి కుమార్తె పాత్రలో, పవర్ఫుల్ ఎక్స్ ప్రెషన్స్ ని పలికించడంలో సూపర్బ్ అనిపించింది. హేమల్ ఇంగ్లే ఉన్నంతలో బాగానే చేసింది. ముఖ్య పాత్రలు పోషించిన అజయ్, రాజా రవీంద్ర, కోట శ్రీనివాసరావు, రవి వర్మ, ధన్ రాజ్ లు స్క్రీన్ మీద కనిపించినంతలో ఓకే అనిపించారు.

తెర వెనుక టాలెంట్..

నంద్యాల రవి తీసుకున్న కథ చెప్పుకోదగినది కాదు. ఒక రెండు క్రైమ్ పాయింట్స్ ని కలుపుతూ కథ రాసుకున్నారు. ఇలాంటి సినిమాలకి కథ కన్నా కథనం అందులో వచ్చే థ్రిల్స్ చాలా ఇంపార్టెంట్. కానీ ఇందులో మనల్ని నెక్స్ట్ ఏం జరుగుతుందా అని కట్టిపడేసే కథనమూ లేదు, మధ్య మధ్యలో ఎగ్జైట్ చేసే థ్రిల్స్ కూడా లేకపోవడంతో సినిమా ఆధ్యంతం బోరింగ్ గా సాగుతుంది. ఇప్పటి వరకూ ప్రేమ కథలని డీల్ చేసి అందులోనూ పెద్దగా సక్సెస్ కాలేకపోయిన విజయ్ కుమార్ కొండ థ్రిల్లర్ సినిమా తీయడంలోనూ ఫెయిల్ అయ్యాడు. ఇక్కడ హీరో ప్రాబ్లెమ్ లో ఇరుక్కున్నాడు ఆ సమస్య నుంచి ఎలా బయటకి వచ్చాడు అనేదే కథ అయినప్పుడు అతని పెయిన్, ఎమోషన్స్, భయటపడతాడా లేదా అనే ఫీలింగ్ ఆడియన్స్ కి కలగాలి, కానీ 2 గంటల పాటు ఎక్కడా ఆ ఫీల్ కలగకపోవడంతో చూసే ప్రతి ఒక్కరినీ డిజప్పాయింట్ చేస్తుంది.

ఐ ఆండ్రూ విజువల్స్ మాత్రం ఒక థ్రిల్లర్ సినిమా అనే ఫీలింగ్ ని కలుగజేస్తాయి, ఆ విజువల్స్ ఫీల్ కి తగ్గట్టు సురేష్ బొబ్బిలి మ్యూజిక్ కూడా బాగుంది. అక్కడక్కడా నిద్ర వస్తున్నా మ్యూజిక్ వలనే సినిమాలో ఏదో ఉందని లేచి చూస్తుంటాం. తీసినంతలో ఉన్నదాన్ని ఎడిటర్ ప్రవీణ్ పూడి షార్ట్ గానే కట్ చేసాడు కానీ అది కూడా బోర్ కొట్టించేసింది. దేవేష్ – మహీధర్ నిర్మాణ విలువలు అయితే బాగున్నాయి.

విజిల్ మోమెంట్స్:

– రాజ్ తరుణ్ అండ్ పూర్ణ పెర్ఫార్మన్స్
– బ్యాక్ గ్రౌండ్ మ్యూజిక్
– థ్రిల్లర్ మూడ్ ని సెట్ చేసే విజువల్స్

బోరింగ్ మోమెంట్స్:

– కథ
– కథనంలో ఆసక్తి లేకపోవడం
– స్లో నేరేషన్ ఫీలింగ్
– నో థ్రిల్స్, నో కామెడీ, నో ఎమోషన్స్
– వీక్ డైరెక్షన్
– లాజిక్స్ లేని క్రైమ్ సాల్వింగ్
– పరమ బోరింగ్ ఫస్ట్ హాఫ్

విశ్లేషణ:

పవర్ ప్లే – క్రికెట్ లో ఈ పదం వినగానే చూసే ఆడియన్స్ రోమాలు నిక్కబొడుచుకుంటాయి, ఏమవుతుందా అనే టెన్షన్ హైలో ఉంటుంది. ఈ సినిమా అలానే ఉంటుందనుకొని సినిమాకి వెళ్లారో మీకు నీరసం, చిరాకు, ఎందుకు వచ్చామురా బాబు అనే ఫీలింగ్ కలగడం మాత్రం పక్కా.. విజయ్ కుమార్ కొండ – రాజ్ తరుణ్ ల కాంబినేషన్ లో మరో ప్లాప్ ‘పవర్ ప్లే’. కానీ కెరీర్ పరంగా రాజ్ తరుణ్ కి మరో కోలుకోలేని దెబ్బ అని చెప్పచ్చు.

చూడాలా? వద్దా?: స్కిప్ చేసే మూవీస్ లిస్టులో చేర్చేయచ్చు.

తెలుగుబులెటిన్.కామ్ రేటింగ్ : 1.5/5