ఎస్వీబీసీలో రాఘవేంద్రుడి మాయ: నిగ్గు తేల్చనున్న పృధ్వీ!

శ్రీ వెంకటేశ్వర భక్తి ఛానల్‌కి సంబంధించి గతంలో చాలా ఆరోపణలు వచ్చాయి. మరీ ముఖ్యంగా, రాఘవేంద్రరావు ఆ ఛానల్‌ బాధ్యతలు స్వీకరించిన తర్వాత దాన్నొక ‘ఆదాయపు వనరు’గా కొందరు రాజకీయ పెద్దలు ఎంచుకున్నారనీ, ఈ క్రమంలో రాఘవేంద్రరావు సైతం చాలా గట్టిగా వెనకేసుకొచ్చారనీ ఆరోపణలు వెల్లువెత్తిన విషయం విదితమే.

రాఘవేంద్రరావు తనకు అత్యంత నమ్మకస్తుడైన ఓ వ్యక్తికి ఎస్వీబీసీలో కీలక బాధ్యతలు అప్పగించాక వ్యవహారం అసలు మలుపు తిరిగింది. తన సంస్థల్లో పనిచేసేవారిని రాఘవేంద్రరరావు, సదరు వ్యక్తి ద్వారా ఎస్వీబీసీలోకి జొప్పించి (సింగర్స్‌, యాంకర్స్‌ లాంటోళ్ళని) ప్రభుత్వం తరఫున వారికి జీతాలు ఇప్పించి, లక్షలు, కోట్లు కొల్లగొట్టేశారన్నది రాఘవేంద్రరావు మీద వచ్చిన ఆరోపణ.

ఇప్పుడు అదే ఎస్వీబీసీకి ఛైర్మన్‌గా సినీ నటుడు పృధ్వీ ఎంపికయ్యారు. ముఖ్యమంత్రి వైఎస్‌ జగన్‌, తనకు ఎన్నికల్లో సాయం చేసిన పృధ్వీకి ఇంతటి కీలక బాధ్యతలు అప్పగించడం అందర్నీ ఆశ్చర్యపరిచింది. అయితే, రాఘవేంద్రరావు హయాంలో జరిగిన ‘కొల్లగొట్టబడిన’ నిధుల్ని వెలికి తీసేందుకు పృధ్వీ ప్రయత్నించనున్నారనీ, ఈ క్రమంలో ఆయనకు ప్రభుత్వం నుంచి పూర్తి సహాయ సహకారాలు వున్నాయనీ తెలుస్తోంది.

మరోపక్క, తాజా పరిణామాలపై దర్శకేంద్రుడు కూడా అప్రమత్తమయ్యాడట. తనకున్న ‘పెద్దల పరిచయాలతో’ పృధ్వీని తనవైపుకు తిప్పుకునేందుకు ప్రయత్నాలు షురూ చేశారట. అవకాశాల పేరుతో పృధ్వీని లొంగదీసుకుంటారా.? డబ్బుతో ఆయన్ని కంట్రోల్‌లో పెడతారా.? అన్న విషయమై సినీ వర్గాల్లో ఆసక్తికరమైన చర్చ జరుగుతోంది.

అసలంటూ ఎస్వీబీసీలో అక్రమాలు జరగకపోతే రాఘవేంద్రరావు ఎందుకు ఇంతలా తహతహలాడతారని సినీ ప్రముఖులు చర్చించుకుంటున్నారు. అయితే, ఇదంతా ఓ పెద్ద రాజకీయ కుట్ర అనీ, రాఘవేంద్రరావుని కుట్రపూరితంగా ఇరికించే ప్రయత్నాలు జరుగుతున్నాయన్న మరో వాదన కూడా తెరపైకొస్తోంది. మరి, పృధ్వీ ఏం చేస్తాడు.? తనకు దక్కిన మంచి పదవిని అడ్డంపెట్టుకుని, సినీ పరిశ్రమపై ఆయన పెత్తనం చేయబోతున్నారా? వేచి చూడాల్సిందే.