వచ్చే ఒలింపిక్స్ లో బంగారు పతకం సాధిస్తాను: పీవీ సింధు

భారత స్టార్‌ షట్లర్‌, రెండు వరుస ఒలింపిక్స్ లో రెండు పతకాలు సాధించిన తెలుగు తేజం, వైజాగ్‌ స్టీల్‌ బ్రాండ్‌ అంబాసిడర్‌ పీవీ సింధు విశాఖ ఉక్కు కర్మాగారంలో నిర్వహించిన పలు కార్యక్రమాల్లో పాల్గొన్నారు. ఈసంధర్బంగా స్థానిక ఇండోర్‌ స్టేడియంలోని చిన్నారుల బ్యాడ్మింటన్‌ టోర్నమెంట్‌ను ఆమె ప్రారంభించారు. అనంతరం విమల విద్యాలయానికి వెళ్లి విద్యార్థులతో ముచ్చటించారు. క్రీడల్లో ఉత్తమ ప్రదర్శనను కనబరిచిన విద్యార్థులకు ఆమె పతకాలు అందజేశారు. అనంతరం జరిగిన సన్మాన కార్యక్రమంలో సింధు మాట్లాడారు. ‘

నాపై ప్రజలు చూపిస్తున్న అదరాభిమానాలకు కృతజ్ఞతలు. విశాఖలో బ్యాడ్మింటన్‌ అకాడమీ నెలకొల్పాలనే అంశంపై ఆలోచించి నిర్ణయం తీసుకుంటాను. తప్పకుండా అకాడమీ నెలకొల్పడానికే శాయశక్తులా ప్రయత్నిస్తాను. మరింతమంది క్రీడాకారులను తీర్చదిద్దేందుకు నావంతు కృషి చేస్తాను. గతంలో ఈ పాఠశాలను సందర్శించినప్పుడు చాలా మంది క్రీడాకారులు వివిధ ఆటల్లో రాణించడం చూశాను. ఇలాగే వారందరు కష్టపడుతూ.. రానున్న రోజుల్లో దేశానికి పతకాలు సాధించాలని కోరుకుంటున్నాను. మీ ప్రేమ, ఆప్యాయతలు నాపై ఎల్లప్పుడూ ఉండాలి. మీ ఆదరాభిమానాలతో వచ్చే ఒలింపిక్స్ లో బంగారు పతకం సాధిస్తాను’ అని సింధు తెలిపారు.