ఒక్కరోజుకే స్ఫూర్తి ‘అంతం’

‘మీ స్ఫూర్తికి, స్వీయ నియంత్రణకు ధన్యవాదాలు చెబుతున్నా.. జనతా కర్ఫ్యూలో దేశానికే తెలంగాణ ఆదర్శంగా నిలిచింది. ఇదే స్ఫూర్తి ఈనెల 31 వరకు కొనసాగిద్దాం’ అంటూ తెలంగాణ సీఎం కేసీఆర్ విన్నవించి 12 గంటలు కూడా కాకముందే పరిస్థితి మారిపోయింది. ఆదివారం మొత్తం ఇళ్లకే పరిమితమైన ప్రజలు సోమవారం ఒక్కసారిగా రోడ్లపైకి వచ్చేశారు. 31 వరకు రాష్ట్రం లాక్ డౌన్ అని, ఎవరికీ బయట తిరగడానికి అనుమతి లేదని చెప్పినా జనం పట్టించుకోలేదు.

ఉదయం నెమ్మదిగా ప్రారంభమైన జనసంచారం క్రమంగా పెరిగిపోయింది. తెలంగాణలోనే కాకుండా అటు ఏపీలోనూ ఇదే పరిస్థితి నెలకొంది. దీంతో రాష్ట్ర ప్రభుత్వాలు అప్రమత్తమై నివారణ చర్యలు చేపట్టాయి. సరైన కారణం లేకుండా రోడ్డుపైకి వచ్చే ఎలాంటి వాహనాలనైనా సీజ్ చేయాలని నిర్ణయించుకున్నారు. ఒక్కసారి వాహనం సీజ్ చేస్తే లాక్ డౌన్ ముగిసిన తర్వాతే దానిని తిరిగి స్వాధీనం చేస్తారు.

మెడికల్ ఎమర్జెన్సీతోపాటు నిత్యావసర వస్తువుల కొనుగోలుకు కాస్త వెసులుబాటు కల్పించిన నేపథ్యంలో జనం రోడ్లపైకి వస్తున్నారు. దీంతో అలాంటి వారిని అదుపు చేయడం పోలీసులకు తలకు మించిన భారంగా పరిణమించింది. దీంతో డీజీపీ మహేందర్ రెడ్డి పలు సూచనలు చేశారు. రాత్రి ఏడు గంటల నుంచి ఉదయం 6 గంటల వరకు కూరగాయలు, కిరాణా, పెట్రోల్ బంకులు సహా అన్నీ మూసివేస్తారని.. ఆ సమయంలో ఎవరూ బయటకు రాకూడదని స్పష్టంచేశారు.

అలాగే నిత్యావసర వస్తువుల కొనుగోలు పేరుతో ఇష్టానుసారం రోడ్లపైకి వస్తే కుదరదన్నారు. తమ నివాస ప్రాంతం నుంచి రెండు కిలోమీటర్ల మించి దూరం వెళితే చర్యలు తీసుకుంటామని పేర్కొన్నారు. మరోవైపు కేంద్ర ప్రభుత్వం సైతం లాక్ డౌన్ ఉల్లంఘనలపై దృష్టి సారించింది. లాక్ డౌన్ ఉల్లంఘించినవారిపై కఠిన చర్యలు తీసుకోవాలని యోచిస్తోంది. ప్రజల సంక్షేమం కోసమే ఈ చర్యలు చేపట్టామని, ఇవి సరిగా అమలయ్యేందుకు ప్రజలు సహకరించాలని అధికారులు, పోలీసులు కోరుతున్నారు.