రగులుతోన్న కోనసీమ: జిల్లా పేరు మార్పుపై అమలాపురంలో తీవ్ర ఉద్రిక్తత

ప్రశాంతతకు మారు పేరులా నిలిచే కోనసీమ ప్రాంతం రావణకాష్టంలా రగులుతోంది. కొత్త జిల్లాల్లో భాగంగా కోనసీమ జిల్లా ఏర్పాటు చేసింది రాష్ట్ర ప్రభుత్వం. అయితే.. జిల్లాకు బీఆర్ అంబేడ్కర్ పేరు పెట్టాలనే డిమాండ్ నేపథ్యంలో ఇటివలే ‘డాక్టర్ బీఆర్ అంబేద్కర్ కోనసీమ’ జిల్లాగా మార్చారు. ఏమైనా అభ్యంతరాలుంటే 30 రోజుల్లోగా కలెక్టర్ కు తెలియజేయాలని ప్రభుత్వం సూచించింది. అయితే.. పరిస్థితులు చేతులు దాటిపోయేంతగా అల్లర్లకు దారి తీసింది.

ఇదే ఇప్పుడు ఆ ప్రాంతంలో నిరసనలు, ఆగ్రహావేశాలకు కారణమవుతోంది. ఏకంగా మంత్రి ఇంటికి నిప్పు పెట్టడం, ఎమ్మెల్యే ఇంటిపై దాడి, జిల్లా ఎస్పీపై దాడి జరగడం కోనసీమ ప్రాంతంలోనే జరిగాయంటే ఆశ్చర్యపోవాల్సిందే. కోనసీమ జిల్లా సాధన సమితి ఆధ్వర్యంలో వందలాది యువకులు అమలాపురం పట్టణం గడియార స్తంభం సెంటర్లో ఆందోళన చేపట్టారు. ‘కోనసీమ జిల్లా ముద్దు.. వేరే పేరు వద్దు’ అంటూ నినాదాలతో హోరెత్తుతోంది.

పోలీసులు అక్కడికి చేరుకుని కొందరిని అదుపులోకి తీసుకున్నా.. మరికొందరు తప్పించుకోవడం.. పోలీసులు వెంటబడటం జరిగింది. స్వయంగా జిల్లా ఎస్పీ సుబ్బారెడ్డి అక్కడకు చేరుకుని పరిస్థితి సమీక్షించారు. ఈక్రమంలో లాఠీచార్జి, రాళ్లదాడి జరిగింది. రాళ్లదాడిలో ఎస్పీతోపాటు మరికొందరు పోలీసులకు, యువకులకు గాయాలయ్యాయి. ఆందోళనకారులను తరలిస్తున్న బస్సు అద్దాలను ధ్వంసం చేశారు. ఇదే క్రమంలో కలెక్టరేట్ వద్ద ఓ బస్సును ఏకంగా తగలబెట్టేశారు.

ఆందోళనకారులు మరింతగా చెలరేగి ఏకంగా మంత్రి విశ్వరూప్ ఇంటికి నిప్పు పెట్టారు. ఆయన కార్యాలయంలోని ఫర్నీచర్, అద్దాలను ధ్వంసం చేశారు. వెంటనే పోలీసలు చాకచక్యంగా వ్యవహరించి వారి కుటుంబసభ్యులను అక్కడి నుంచి తరలించారు. ఘటనపై హోంమంత్రి తానేటి వనిత స్పందించారు. జిల్లా ప్రజల విజ్ఞప్తి మేరకే అంబేడ్కర్ పేరు పెట్టామని.. ఇప్పుడు వ్యతిరేకించడం బాధాకరమని అన్నారు. సంఘవిద్రోహ శక్తులు కొందరు ఆందోళనకారులను నడిపిస్తున్నాయని.. విచారణ జరిపి నిందితులపై చర్యలు తీసుకుంటామని అన్నారు.