ఆస్పత్రుల తీరు మారదా.. శవాల మీద పైసలు ఏరుకోవడమేనా?

మనిషికి ప్రాణం మీద ఉన్నంత మమకారం దేని మీదా ఉండదు. సరిగ్గా ఇదే పాయింట్ పై ఆధారపడి పలు ఆస్పత్రులు వ్యాపారం చేస్తున్నాయి. వైద్యం కోసం తమ దగ్గరకు వచ్చినవారి నుంచి అందినకాడికి దండుకుంటున్నాయి. కొన్ని ఆస్పత్రులైతే శవాల మీద కూడా పైసలు ఏరుకుంటూ పవిత్రమైన వైద్య వృత్తి విలువలకు నిలువునా పాతరేస్తున్నాయి. డబ్బులు కట్టిన తర్వాతే శవాన్ని తీసుకెళ్లాని తేల్చి చెబుతున్నాయి.

ప్రపంచం అంతా ఓవైపు కరోనాతో అల్లకల్లోలం అవుతుండగా.. ఇటీవలే ఈ చికిత్సకు అనుమతి రావడంతో ప్రైవేటు, కార్పొరేట్ ఆస్పత్రులు మాత్రం తమ దందాతో రెచ్చిపోతున్నాయి. రోజుకు ఏకంగా లక్షల్లో ఫీజులు గుంజుతూ బాధితుల నడ్డి విరుస్తున్నాయి. ప్రతిరోజూ ఇలాంటి ఘటనలు వెలుగు చూస్తూనే ఉన్నాయి. సామాన్యులకే కాదు.. కరోనా బారిన పడిన డాక్టర్లకు కూడా ఈ ఇబ్బందులు తప్పడంలేదు.

ఫీవర్ ఆస్పత్రికి చెందిన డాక్టర్ కు హైదరాబాద్ చాదర్ ఘాట్ లోని తుంబే ఆస్పత్రి ఒక్కరోజుకు లక్షన్నర బిల్లు వేయగా.. తాజాగా ఏఐజీ ఆస్పత్రి మరో మహిళా డాక్టర్ కు ఇదే తరహాలో షాక్ ఇచ్చింది. కరోనా పాజిటివ్ తో తండ్రితో కలిసి ఆమె ఆస్పత్రిలో చేరారు. ఆమెకు ఎలాంటి కరోనా లక్షణాలూ లేవు. అయినప్పటికీ ఆక్సిజన్ పెట్టినట్టుగా, ఐవీలు ఇచ్చినట్టుగా లక్షల్లో బిల్లు వేశారని.. దీనిపై ప్రశ్నించడంతో బలవంతంగా డిశ్చార్జి చేస్తున్నారంటూ ఆమె తీసిన సెల్పీ వీడియో బుధవారం సంచలనమైంది.

నిజానికి ఏదైనా రోగం వచ్చి కార్పొరేట్ ఆస్పత్రికి వెళితే ఆస్తులు అమ్ముకోక తప్పదనే వ్యాఖ్యలు వినిపించేవి. కానీ తాజాగా కరోనా చికిత్స విషయంలో అవి అనుసరిస్తున్న తీరు చూస్తుంటే ఆస్తులు అమ్ముకున్నా కూడా కట్టలేని పరిస్థితులు నెలకొన్నాయి. అంత భారీగా బిల్లులు వేసి దారుణంగా దోచుకుంటున్నాయి. లాక్ డౌన్ కాలంలో ఆస్పత్రులు మూసి ఉంచడంతో అప్పటి నష్టాలను కూడా ఇప్పుడు రికవరీ చేసుకునే దిశలో ఆయా ఆస్పత్రులు భారీగా దండుకుంటున్నాయని అంటున్నారు. కరోనా చికిత్సకు ప్రైవేటు ఆస్పత్రులకు అనుమతి ఇవ్వనంత కాలం అంతా బాగానే ఉంది.

అయితే, కేసుల సంఖ్య పెరుగుతుండటంతో ప్రైవేటు ఆస్పత్రుల్లో కూడా చికిత్సకు ప్రభుత్వం అనుమతి ఇచ్చింది. అంతే.. అప్పటివరకు సైలెంటుగా ఉన్న ఆస్పత్రులు ఒక్కసారిగా జూలు విదిల్చాయి. కరోనా చికిత్సకు దేనికెంత చార్జి వేయాలో సర్కారు స్పష్టం చేసినా.. వాటిని ఏమాత్రం పట్టించుకోలేదు. సాక్షాత్తు హైకోర్టు సైతం ఈ విషయంలో ప్రైవేటు, కార్పొరేట్ ఆస్పత్రుల తీరును తీవ్రంగా ఆక్షేపించింది. ప్రభుత్వ ఆదేశాలు ఉల్లంఘిస్తున్న ఆస్పత్రులపై కొరడా ఝలిపించాల్సిందేనని సర్కారుకు స్పష్టంచేసింది. అయితే, ఎవరేం చెప్పినా మాకేంటి అనే రీతిలో ప్రైవేటు ఆస్పత్రులు తమ దందా మాత్రం ఆపడంలేదు. ఈ విషయంలో సర్కారు కఠిన చర్యలు తీసుకుంటే తప్ప వాటి తీరు మారదు.