కరోనా దెబ్బకి విలవిల్లాడుతున్న ప్రింట్‌ మీడియా.!

కరెన్సీ నోటు ద్వారా కరోనా వైరస్‌ వ్యాప్తి చెందే అవకాశాలున్నాయని వైద్య నిపుణులు హెచ్చరిస్తున్నారు. ఈ నేపథ్యంలోనే డిజిటల్‌ లావాదేవీలవైపు మొగ్గు చూపాలనే సూచనలు తెరపైకొస్తున్నాయి. మరి, వార్తా పత్రికల ద్వారా కరోనా వైరస్‌ ఎందుకు వ్యాపించదు.? ఈ ప్రశ్న సాధారణ ప్రజానీకంలో తలెత్తడం సహజమే. ‘ఆ అవకాశమే లేదు..’ అంటూ పలు మీడియా సంస్థలు నిపుణుల్ని తీసుకొచ్చి మరీ చెప్పిస్తున్నాయి.

వార్తా పత్రికలు అత్యాధునిక సాంకేతిక పద్ధతుల్లో తయారవుతున్నాయనీ, దాంతో వాటి ద్వారా కరోనా వైరస్‌ వ్యాప్తి చెందదనీ సదరు నిపుణులు చెబుతున్నారు. మీడియా సంస్థలు ఎంత మొత్తుకుంటున్నా, వార్తా పత్రికలు ఇంటికి చేరాలంటే, దానికి చాలా పెద్ద కథే వుంటుంది. కూరగాయలు, అవసరమైన వస్తువులు కొనేందుకు కూడా చాలామంది బయటకు వెళ్ళడానికి ఇష్టపడ్డంలేదు. ఒకవేళ వెళ్ళినా, వాటిని శుభ్రం చేసేందుకు చాలా కష్టాలు పడాల్సి వస్తోంది. వార్తా పత్రికల విషయంలో అలాంటిది చేయలేం కదా.! పరిస్థితి తీవ్రత ఆయా మీడియా సంస్థలకు కూడా తెలుసు. అందుకే, టాబ్లాయిడ్‌ ఎడిషన్స్‌ని రద్దు చేసుకుంటూ వస్తున్నాయి.

ఇప్పటికే ఆంధ్రజ్యోతి తమ ట్యాబ్లాయిడ్‌ని రద్దు చేసి, ఆ విశేషాల్ని మెయిన్‌ ఎడిషన్స్‌లో కలిపేస్తోంది. మరోపక్క, ఈనాడు కూడా అదే బాటలో నడవనున్నట్లు తెలుస్తోంది. ఆ పత్రిక ఈ పత్రిక అన్న తేడాల్లేవు.. దాదాపుగా అన్ని ప్రధాన పత్రికలూ ఇదే బాటలో నడవాల్సిన పరిస్థితి ఏర్పడింది. ఎప్పటికప్పుడు వార్తలు డిజిటల్‌ మీడియా ద్వారా అందుతుండడంతో గత కొన్నాళ్ళుగా ప్రింట్‌ మీడియాపై జనంలో కూడా ఆసక్తి తగ్గిన మాట వాస్తవం. ఈ కరోనా దెబ్బకి, వార్తా పత్రికల అలవాటు పూర్తిగా జనాలకు తగ్గిపోయే అవకాశముంది. అదే జరిగితే, ప్రింట్‌ మీడియాకి అదొక ప్రమాదకరమైన పరిస్థితి అని నిస్సందేహంగా చెప్పొచ్చు.

కానీ, మీడియా సంస్థలు మాత్రం, ప్రింట్‌ మీడియాకి వుండే ఆ ప్రత్యేకత ఎప్పటికీ తగ్గబోదని చెబుతున్నాయి. ఏదిఏమైనా, కరోనా దెబ్బకి ప్రింట్‌ మీడియా విలవిల్లాడుతున్న మాట వాస్తవం.