నేచురల్ స్టార్ నాని హీరోగా విక్రమ్ కుమార్ దర్శకత్వంలో తెరకెక్కిన ‘గ్యాంగ్ లీడర్’ మరికొద్ది గంటల్లో ప్రేక్షకుల ముందుకు రానుంది. ఈ రోజు రాత్రి యూఎస్ ప్రీమియర్స్ కోసం భారీ ఏర్పాట్లు చేశారు. కాస్త అటూ ఇటూగా తెలుగు రాష్ట్రాల్లోనూ ప్రివ్యూ షోలకు రంగం సిద్ధమయ్యింది. 50 కోట్ల రూపాయలకు కాస్త అటూ ఇటూగా ఈ సినిమా కోసం ఖర్చు చేశారన్న ప్రచారం జరుగుతోంది. నాని మీద అంత పెద్ద బడ్జెట్ పెట్టారా.? ఎందుకు.? అన్న ప్రశ్నలు ఓ పక్క విన్పిస్తుంటే, ‘అది నిజం కాదు’ అనే ఇంకో వాదన కూడా తెరపైకొస్తోంది.
బడ్జెట్ సంగతి పక్కన పెడితే, ‘గ్యాంగ్ లీడర్’ సినిమాతో ప్రీ రిలీజ్ బిజినెస్ పరంగా సరికొత్త సంచలనాలకు నాని తెరలేపాడన్నది నిర్వివాదాంశం. సినిమా ప్రమోషన్స్ విషయంలో మైత్రీ మూవీ మేకర్స్ ఎక్కడా రాజీపడదని చాలా సినిమాలతో నిరూపితమయ్యింది. ఈ ‘గ్యాంగ్ లీడర్’కి కూడా ప్రమోషన్స్ ఓ రేంజ్లో చేసేశారు. సినిమా ఫలితం మరికొద్ది గంటల్లో తేలిపోనుంది. ప్రీ రిలీజ్ బజ్ అయితే చాలా పాజిటివ్గా కన్పిస్తుండడంతో ఓపెనింగ్స్ పరంగా నాని తన కెరీర్లోనే అత్యుత్తమ గణాంకాల్ని నమోదు చేస్తాడని ట్రేడ్ పండితులు అంచనా వేస్తున్నారు.
Also Read: ప్రీ రిలీజ్ బిజినెస్ లో.. దుమ్ము రేపిన గ్యాంగ్ లీడర్ !
‘ప్రోమోస్లో కన్పించే కంటెంట్ గోరంత.. సినిమాలో కంటెంట్ కొండంత.. అడుగడుగునా థ్రిల్లింగ్ అంశాలుంటాయి.. ఎవరూ ఊహించని ట్విస్టులుంటాయి.. సినిమాని ఇంకో లెవల్లో ఆడియన్స్ ఎంజాయ్ చేస్తారు..’ అంటూ సినిమాపై ప్రీ రిలీజ్ కబుర్లు బయటకు వస్తున్నాయి. విక్రమ్ కుమార్ సినిమాలు రొటీన్కి భిన్నంగా వుంటాయని ప్రత్యేకంగా చెప్పాల్సిన పనిలేదు. నాని సంగతి సరే సరి.. రొటీన్ కమర్షియల్ సినిమాల్ని పక్కన పెట్టి, విలక్షణ సినిమాల వైపు అడుగులేస్తున్నాడు.
ఈ నేపథ్యంలో ఈ ఇద్దరి నుంచి ఎవరూ ఊహించని ఓ మంచి సినిమా.. అదీ కమర్షియల్ అంశాలతో రాబోతోందనడం బహుశా అతిశయోక్తి కాకపోవచ్చు. ‘ఆర్ఎక్స్100’ ఫేమ్ కార్తికేయ ఈ సినిమాలో విలన్గా నటిస్తుండడం గమనార్హం. ‘గ్యాంగ్లీడర్’ హైలైట్ పాయింట్స్లో దీన్ని కూడా ఒకటిగా చెప్పుకోవచ్చు. సినిమా ప్రమోషనల్ సాంగ్ ఇప్పటికే అదనపు గ్లామర్ తీసుకొచ్చింది. అయితే, హీరోయిన్ గ్లామర్ ఒక్కటీ సినిమాకి పెద్ద మైనస్ పాయింట్ అనే ప్రచారం జరుగుతోంది. అయితే, గ్లామర్ లేకపోతేనేం.. హీరోయిన్, తన నటనతో మెప్పిస్తుందన్నది చిత్ర యూనిట్ వర్గాలు చెబుతున్న మాట.
ఓవర్సీస్లో ప్రీమియర్స్కి ప్రీ-బుకింగ్ ఆల్మోస్ట్ ఫినిష్ అయిపోయింది. తెలుగు రాష్ట్రాల్లోనూ అడ్వాన్స్ బుకింగ్లు దాదాపు ఫుల్ అయిపోయినట్లు ఎర్లీ రిపోర్ట్స్ చెబుతున్నాయి. నానికి క్లాస్ సెంటర్స్తోపాటు, మాస్ సెంటర్స్తోనూ పట్టున్న దరిమిలా, రూరల్ ఏరియాస్లోనూ థియేటర్లు అడ్వాన్స్ బుకింగుల జోరుతో కళకళ్ళాడుతుండడం గమనార్హం. ‘జెర్సీ’తో ఈ మధ్యనే మంచి విజయాన్ని అందుకున్న నాని, ఈసారి 50 కోట్లు కొల్లగొట్టడం ఖాయమని ట్రేడ్ వర్గాలూ అంచనా వేస్తున్నాయి. ‘మీ అంచనాలైతే తప్పబోం.. ఖచ్చితంగా ఓ మంచి సినిమా అవుతుంది.. కమర్షియల్ అంశాల గురించి సినిమా విడుదలయ్యాక మాట్లాడుకుందాం.. సినిమాలో అన్నీ వుంటాయ్..’ అని సాక్షాత్తూ నాని భరోసా ఇస్తుండడం గమనార్హం.