‘మా’లో ప్రకంపనలు..! గెలిచిన ప్రకాశ్ రాజ్ ప్యానెల్ సభ్యులు రాజీనామా

‘మా’ ఎన్నికల ఘట్టం జరిగినంతవరకూ ఎంత రచ్చ జరిగిందో తెలిసిందే. ఎన్నికలు ముగిసాయి.. అంతా సద్దుమణిగిందని అనుకుంటున్న పరిస్థితుల్లో ఇప్పుడు మా ఎన్నికల అంశం మరో సంచలనానికి తెర తీసింది. తన ప్యానెల్ నుంచి గెలిచిన 11 మంది సభ్యులు రాజీనామా చేస్తున్నట్లు ప్రకటించి ప్రకంపనలు రేపారు ప్రకాశ్ రాజ్. మంగళవారం ఏర్పాటు చేసిన ఆయన మీడియాతో ఆయన మాట్లాడారు. ‘రెండు మూడు రోజుల నుంచి జరుగుతున్న సంఘటనలపై కూర్చొని చర్చించాం. ‘మా’ మంచి కోసమే పోటీలో నిలిచాం. తొలి నుంచీ ఒకే ప్యానెల్ వుండాలని ప్రచారం చేశాం. కానీ క్రాస్ ఓటింగ్  జరిగింది. ఎన్నికలు జరిగిన విధానంపై గెలిచిన, ఓడిపోయిన సభ్యులతో చర్చించాం. చాలా రౌడీయిజం జరిగింది. మాటల యుద్ధం, పోస్టల్ బ్యాలెట్స్‌ కౌంటింగ్ లో అన్యాయం జరిగింది.

అయినా ఎన్నికలు అపకూడదనే ముందుకు వెళ్లాం. వేరే వూళ్ల నుంచి మనుషులను తీసుకొచ్చారు. డీఆర్‌సీ చీఫ్‌గా వున్న మోహన్ బాబు కౌంటింగ్‌కు వచ్చారు. క్రమశిక్షణ లేకుండా సీనియర్ నటుడు బెనర్జీపై చేయి చేసుకున్నారు. అసభ్య పదజాలంతో మాట్లాడారు. నరేశ్ ప్రవర్తన బాలేదు. ఈసీ రిజల్ట్స్ పక్కనబెట్టారు. మరుసటి రోజు పోస్టల్ బ్యాలెట్లు కలపడం వంటి చర్యలతో లెక్కలు మారాయి. ఆదివారం గెలిచినవారు.. సోమవారం ఎలా ఓడిపోయారు..? అందరినీ కలుపుకుని వెళ్తామన్న విష్ణు.. జనరల్ సెక్రటరీ, ట్రెజరీ మనవాడేనని.. ఎవడు అడ్డొచ్చినా మాదే మెజార్టీ అని ఎలా అన్నారు. విష్ణు మాటలకు చాలా బాధేసింది. మీరూ.. మేమూ అంటే కలిసి పనిచేయగలమా..? సగం సగం ప్యానెల్ వస్తే ఏం జరిగిందో గడిచిన రెండేళ్లలో చూస్తూనే వున్నాం.

‘మా’ అసోసియేషన్ మసకబారిందనే వరకు పరిస్ధితి వచ్చేసింది. నాకు కావాల్సింది అది కాదు. ఇలా వుంటే మీతో కలిసి పని చేయగలమా..? అని నా ప్యానెల్ సభ్యులు అడిగారు. ‘మా’ సంక్షేమ కార్యక్రమాలు ఆగిపోతాయా అన్న భయం వేసింది. విష్ణు బాగా పనిచేయాలనే ఉద్దేశంతో.. ఆయన హామీలకు అడ్డు రాకూడదని.. ఒకవేళ ఎలాంటి పని జరగకపోయినా తమపై నిందలు వేయకుండా ఈ నిర్ణయం తీసుకున్నాం. ఎంతో ఆలోచించిన తర్వాత సినిమా బిడ్డలు ప్యానెల్ నుంచి గెలిచిన 11 మంది రాజీనామా చేస్తున్నాం. మీకు కావాల్సిన వాళ్లని పెట్టుకుని ఫ్రీగా పనిచేయండి. ఓటేసిన మా సభ్యులకు న్యాయం జరగాలనేదే మా ఆకాంక్ష. వారికి ఎలాంటి సంక్షేమం అందుతుందో చూస్తూ వుంటాం.

ఒకవేళ మీరు పనిచేయకపోతే వారి తరపున మేము ప్రశ్నిస్తాం. అలాగని.. మీ పనులకు అడ్డురాము. అసోసియేషన్ లో ఉండి పనిచేయడం కంటే.. గొప్ప పనిని చేయించడమే ఉత్తమం. నా రాజీనామాను ఆమోదించనని విష్ణు చెప్పారు. కానీ.. ‘మా’ నిబంధనల్లో తెలుగువాడు కానీ వాడు ఓటు వేసేందుకు, మరొకరిని గెలిపించేందుకు మాత్రమే అని.. పోటీ చేసేందుకు వీలు లేదనే నిబంధనను మారిస్తే నా రాజీనామాను వెనక్కి తీసుకుంటాను’ అని అన్నారు.