Prabhas Birthday Special: ఫ్యాన్స్, ఫ్యామిలీ, కిడ్స్.. మాత్రమే కాదు, సెల్ఫ్ సాటిస్ఫై అయ్యే సినిమా దక్కితే హీరోకి ఎంత మధురమో..! ఒక్కోసారి అలా అన్నీ కుదిరే కథలు, చక్కని సినిమాగా మలిచే దర్శకులు, కెరీర్లో మర్చిపోలేని హిట్స్ ప్రతి హీరోకీ దక్కుతాయి. ఇవి ఎన్నిసార్లు చూసినా బోర్ కొట్టవు కదా.. చూసిన ప్రతిసారీ హ్యాపీ ఫీల్ ఇస్తూ.. ఫీల్ గుడ్ మూవీగా మిగిలిపోతాయి. ప్రభాస్ కెరీర్లో అలాంటి సినిమాల్లో ఒకటి ‘మిర్చి’. కథ, కథనం, కంటెంట్ కి తగ్గట్టు ప్రభాస్ లుక్స్, యాక్షన్, కామెడీ.. సినిమాని ఓస్థాయిలో నిలబెట్టాయి. దీంతో సినిమా బ్లాక్ బస్టర్ హిట్ అయింది. ప్రభాస్ సాఫ్ట్ అండ్ యాంగ్రీ యాక్షన్ కు ఏకంగా 2013కి ఉత్తమ నటుడిగా ప్రభుత్వ నంది అవార్డు అందుకున్నారు.
ఫస్టాఫ్ లో ప్రభాస్ చాలా హ్యాండ్సమ్ లుక్ లో కనిపిస్తాడు. అప్పటివరకూ వచ్చిన సినిమాల కంటే బెస్ట్ లుక్ మిర్చిలో కుదిరిందని చెప్పాలి. తాను చాలా నార్మల్ డైలాగ్స్, బాడీ లాంగ్వేజ్ తో కామెడీ కూడా పండిస్తూ ఆకట్టుకుంటాడు. ‘కటౌట్ ని చూసి కొన్నికొన్ని నమ్మేయాలి డ్యూడ్..’, ‘వీలైతే ప్రేమిద్దాం డ్యూడ్’ అనే డైలాగ్స్ బాగా పేలాయి. విలన్ ఇంటికే వెళ్లి సరదాగా కనిపిస్తూ, బ్రహ్మానందంతో కలిసి పండించే కామెడీ, ఫ్యామిలీని ఆకట్టుకునేలా మలచిన తన పాత్రలో ప్రభాస్ ఇమిడిపోయాడు. ప్రభాస్ డైలాగ్స్ లో కూడా చాలా సెటిల్డ్ ఉండేలా దర్శకుడు చక్కగా మలిచాడు. అప్పటివరకూ సాఫ్ట్ గా ఉండే జై (ప్రభాస్)లో ఉగ్రరూపం చూసిన ఫ్యాన్స్ అప్పట్లో ఫిదా అయిపోయారు.
ఇంటర్వెల్ బ్లాక్ ఫైట్లో ప్రభాస్ అసలైన్ యాక్షన్ చూపించి ఫ్యాన్స్ కి కిక్కెంచాడు డైరక్టర్ కొరటాల శివ. ‘నా ఫ్యామిలీ సేఫ్’ అంటూ మాసివ్ డైలాగ్ చెప్పిన ప్రభాస్ కు ఈలలు, కేరింతలే పడ్డాయి. తండ్రిని బెదిరించి వెళ్తున్న వ్యక్తుల్ని ఫాలో అవుతూ చేసే ఫైట్లో ప్రభాస్ లుక్స్, బాడీ లాంగ్వేజ్ గురించి ఎంత చెప్పుకున్నా తక్కువే. నిజంగానే ప్రభాస్ ఓ కటౌట్ అని అనిపించే లుక్ అది. క్లైమాక్స్ లో ప్రభాస్ మాస్ ఫైట్ కి తోడు పూర్తిగా తనదైన నటన కనబరుస్తాడు. పాత్రకు తగ్గట్టు తనలో ఇంటెన్సిటీ చూపించిన ప్రభాస్ కు జ్యూరీ ఉత్తమ నటుడి అవార్డే అందించింది. ఇన్ని ఫ్లేవర్స్ ఉన్న ‘మిర్చి’ ఇప్పటికీ అభిమానులకు హాట్ ఫేవరేట్ మాత్రమే కాదు, ఫ్యామిలీ ఆడియన్స్ కు రిపీటెడ్ వాచ్ మూవీ.