Prabhas Birthday Special: మాస్ సినిమాలు చేస్తే కాదు.. బాడీ లాంగ్వేజ్ లో మాస్ కనిపించాలి. మాస్ డైలాగ్స్, హావభావాలు పలికిస్తే మాస్ ప్రేక్షకులు ఊగిపోవాలి. ప్రేక్షకులకి నవ్వు రావాలి. మాస్ మంత్రంలోనూ ప్రేక్షకులు రిలీఫ్ కావాలి. ఇది అందరికీ సాధ్యమయ్యేది కాదు. మాస్ సినిమాలో డైలాగ్ డిక్షన్, మేనరిజమ్స్ పలికించడం అంత సులువు కాదు. కానీ, ఇందులో సక్సెస్ అయితే స్టార్ ఇమేజ్ వెతుక్కుంటూ వచ్చేస్తుంది. ప్రభాస్ అంతకుముందు చేసిన సినిమాలతో పోల్చి చూస్తే డైలాగ్ డెలివరీ పూర్తిగా మారిపోయిన సినిమా ‘బుజ్జిగాడు’. సినిమా చూస్తే అంతకుమందు సినిమాల్లో చూసిన ప్రభాసేనా అనిపించాల్సిందే. అంతలా ప్రభాస్ లుక్, డైలాగ్ డిక్షన్ మార్చేశాడు దర్శకుడు పూరి జగన్నాధ్.
‘బుజ్జిగాడు’.. పేరుకు తగ్గట్టే మాస్ కంటెంట్ మూవీ. ఇందులో ప్రభాస్ కూడా చాలా క్యాజువల్ లుక్స్ తో కనిపిస్తాడు. డైలాగ్స్ అయితే.. అలవోకగా పలికి తనలో ఇంత మాస్ కామెడీ ఉందా అనిపిస్తాడు. ‘అక్కడో రజినీకాంత్ ఉన్నాడు.. ఇక్కడో రజినీకాంత్ ఉన్నాడు.. ఇద్దరు రజినీకాంత్లు బస్సులో ఉంటే మీరెట్టా వచ్చార్రా’, ‘ఒరేయ్ బాబ్జీ.. ఓల్వో బస్సు కదులుతూండగా అద్దాలు పగలగొట్టేసుకుని నువ్వు బయటకెళ్లిపోతావని అనుకున్నావా’, ‘ఇక్కడో నరం ఉంటది.. పట్టి లాగేసుకుందారేటీ’.. ‘ఏండీ.. ఫోనెత్తండీ.. ఏమన్నా మాటాడండీ’.. అంటూ వెటకారంగా ప్రభాస్ మార్క్ ఎక్స్ ప్రెషన్స్ తో పలికించిన డైలాగులకు ఫ్యాన్స్ ఊగిపోయారు. పాటలు, ఫైట్స్ లో కూడా బాడీ లాంగ్వేజ్ తో మెప్పించాడు ప్రభాస్.
మాస్ పాత్రలు రాయడంలో, హీరో క్యారెక్టరైజేషన్స్ డిజైన్ చేయడంలో పూరి జగన్నాధ్ సిద్ధహస్తుడు. ఎందరో హీరోలకు తమ బాడీలాంగ్వేజ్ మార్చిన పాత్రలు రాశాడు. ప్రభాస్ కూ అదే చేశాడు. ‘ఈ కటౌట్ చూశావా..’ అనే డైలాగ్ కి తగ్గట్టే ప్రభాస్ లుక్ కనిపిస్తుంది. సినిమా మొత్తం కథేమీ ఉండదు.. మొత్తం ప్రభాస్. ఇది తన ఒన్ మ్యాన్ షో. ప్రభాస్-త్రిష జోడీగా ఇది మూడో సినిమా. వర్షం, పౌర్ణమి తర్వాత వచ్చిన సినిమా. సెకండాఫ్ కథనం కొంత గాడి తప్పినా ప్రభాస్ కెరీర్లో మరో 100 రోజుల సినిమాగా నిలిచింది. మాస్ ప్రేక్షకుల్ని అలరించిన సినిమాగా నిలిచింది. మొత్తంగా ప్రభాస్ కెరీర్లో తన బాడీ లాంగ్వేజ్, డైలాగ్ డిక్షన్ కు సంబంధించి ‘బుజ్జిగాడు’కి ముందు తర్వాతగా ఈ సినిమా నిలిచింది.