Prabhas Birthday Special: ప్రభాస్ కు మాస్ ఇమేజ్ వచ్చే వరకూ ఈ సినిమా ఎదురు చూసిందా..? మాస్ ఇమేజ్ వచ్చాక ఈ కథ పడిందా..? వర్షం కంటే ముందే ఈ కథ పడుంటే ఇంకా రేంజ్ పెరిగేదా..? అభిమానుల నుంచి ఇండస్ట్రీ వరకూ ఇలాంటివి ఎన్నో ప్రశ్నలు వేసుకునేలా చేసిన సినిమా ‘ఛత్రపతి’. ప్రభాస్ కు వర్షమే భారీ మాస్ ఇమేజ్ తెచ్చిపెట్టిందంటే.. మరుసటి ఏడాది వచ్చిన ‘ఛత్రపతి’ ఫ్యాన్స్ ను ఊపిరి తీసుకోనివ్వలేదు. ప్రభాస్ కు అసలైన మాస్ కటౌట్ కు కేరాఫ్ అడ్రస్ గా నిలిచిందీ సినిమా. పైగా.. రాజమౌళి తన హై ఎండ్ పొటెన్షియాలిటీని బయటకు తెలుపక ముందు.. తనకున్న మాస్ గ్రాఫ్ తో తీసిన సినిమా. ఇంకేముంది, రికార్డులూ దాసోహమన్నాయ్.
2005లో తెలుగునాట మొత్తం తమిళ డబ్బింగ్ సినిమాల హవా నడుస్తున్న దశలో వచ్చిన అసలు సిసలు తెలుగు కమర్షియల్ హిట్ సినిమాగా నిలిచింది ‘ఛత్రపతి’. ప్రధానంగా తల్లి సెంటిమెంట్ కథ. దీనికి వలస వచ్చిన కూలీల కథను అల్లుకుని మాస్ ఎలిమెంట్స్ తో బీభత్సమే సృష్టించాడు దర్శకుడు రాజమౌళి. ఇందుకు హీరో పాత్రలో ప్రభాస్ తనను తప్ప మరెవరూ ఊహించలేనంతగా ఒదిగి సరైన మాస్ కంటెంట్ తనకు పడితే ఎలా ఉంటదో చూపించాడు. ఆరడుగుల గ్రీకు శిల్పానికి ఏమాత్రం తగ్గని విలనిజం కూడా యాడ్ చేయడంతో ఫైట్స్ అభిమానులతో ఈలలు వేయించాయి. ముఖ్యంగా కాట్ రాజ్ తో ఫైట్ ని చెప్పడం, రాయడం కాదు.. చూసి తీరాల్సిందే అనేలా డిజైన్ చేసింది టీమ్.
ఇంటర్వెల్ బ్లాక్ సినిమాను ఓ స్థాయిలో ఉండడానికి ప్రభాస్ చేసిన యాక్షన్ కు ఫ్యాన్స్ ఊగిపోయారు. ‘ఒట్టేసి ఒక మాట.. ఒట్టేయకుండా ఒక మాట చెప్పను’.. ‘ఒక్క అడుగు’, ‘వాడు పోతే వీడు.. వీడు పోతే వాడు..’ అనే డైలాగ్స్ ఈలలు వేయించాయి. తల్లిని వెదికే క్రమంలో ప్రభాస్ పండించిన భావోద్వేగాలు ప్యామిలీ ఆడియన్స్ ను అకట్టుకున్నాయి. తల్లి ఎవరో తెలిసి కూడా తానెవరో చెప్పుకోలేని పరిస్థితి.. తమ్ముడిపై కోపం ఉన్నా తల్లి కోసం ఏం చేయలేని నిస్సహాయ స్థితిలో ప్రభాస్ నటన ఆకట్టుకుంటుంది. పాటల్లో హీరోయిన్ శ్రియతో ప్రభాస్ హుషారైన డ్యాన్సులు, ఫ్యాన్స్ ను అలరించాయి. దీంతో ప్రభాస్ కెరీర్లో బ్లాక్ బస్టర్ హిట్ గా నిలిచిందీ సినిమా.