Prabhas Birthday Special: హీరోగా నుంచి స్టార్ హీరోగా దశ తిరిగితే తర్వాత వచ్చే సినిమాలపై ఇండస్ట్రీ, ట్రేడ్, బిజినెస్, ఆడియన్స్ లో అంచనాలు పెరిగిపోతాయి. తర్వాత వచ్చే ప్రతి సినిమాను అదే ఆలోచనలతో చూస్తారు. కథల ఎంపిక హీరోలకు చాలా ముఖ్యం. ఒక్కసారి పాన్ ఇండియా క్రేజ్ వస్తే కథల ఎంపిక చాలా ఆలోచించాల్సిందే. రచయిత, దర్శకులు హీరో ఇమేజ్ తగ్గ కథలు తీసుకెళ్లినా.. సాధారణ కథలు తీసుకెళ్లినా అందులో జాతీయస్థాయిలో ఆకట్టుకునే అంశాలు ఏర్చికూర్చి భారీ సినిమాగా తెరకెక్కిస్తారు. బాహుబలి సిరీస్ తో పాన్ ఇండియా స్టార్ గా మారిన ప్రభాస్ కు ఆ ఇమేజ్ కు తగ్గట్టుగానే వచ్చిన సినిమా ‘సాహో’. సుజీత్ దర్శకత్వంలో పూర్తిస్థాయి యాక్షన్ సినిమాగానే తెరకెక్కింది.
పూర్తి యాక్షన్, థ్రిల్లర్ గా తెరకెక్కిన సినిమాలో పోలీస్ ఆఫిసర్ గా జై అనే పాత్రలో ప్రభాస్ నటించారు. సినిమా మొత్తం హాలీవుడ్ మూవీస్ ని తలపించే యాక్షన్ సన్నివేశాలుంటాయి. గ్యాంగ్ స్టర్స్, దొంగతనం, పోలీసుల చేజ్.. తో మొత్తం యాక్షన్ పుల్ ప్యాక్డ్ గా ఉంటుంది. ప్రభాస్ ఇమేజ్ కు తగ్గ కథ.. కథనంతో ఆయన బాడీలాంగ్వేజ్ కి తగ్గట్టుగానే సినిమా ఉంటుంది. యాక్షన్ సీన్స్, అందులో ప్రభాస్ యాక్షన్ ప్రేక్షకుల్ని మైమరిపిస్తాయి. వీళ్లంతా ఎవరు అనే హీరోయిన్ ప్రశ్నకు.. తనకున్న ఫ్యాన్స్ ను ఉద్దేశించి చెప్పిన ‘డైహార్డ్ ఫ్యాన్స్’ డైలాగ్ బాగా పేలింది. గల్లీలో క్రికెట్ ఎవడైనా ఆడతాడు.. ‘గ్రౌండ్ లో సిక్సర్ కొట్టేవాడికే ఓ రేంజ్ ఉంటది’ డైలాగ్ కూడా పాపులర్ అయింది.
చైనా, ఆస్ట్రియా, రొమేనియా, ఇండియా.. ఇలా ఖర్చుకు వెనకాడకుండా సినిమాను భారీష్థాయిలో తెరెక్కించారు. టెక్నికల్ గా ప్రతి విభాగంలోనూ రిచ్ నెస్ ఉండేలా ప్లాన్ చేశారు. సుజీత్ తెరకెక్కించిన విధానం కూడా గ్రాండియర్ గా ఉంటుంది. అయితే.. తెలుగులో సినిమాకు మిశ్రమ ఫలితం దక్కినా బాలీవుడ్ ప్రేక్షకులు మాత్రం సినిమాను బాగా ఆదరించారు. హిందీ బెల్ట్ లో సినిమా సూపర్ హిట్ అయింది. సినిమాకు మేజర్ అట్రాక్షన్ ప్రభాస్. బాహుబలి ఇమేజ్ తో ప్రభాస్ ఎలాంటి సినిమా చేస్తాడా..? అనేంతగా ప్రభాస్ పేరు మోగుతూ ప్రేక్షకులు ఎదురుచూసిన సినిమాగా సాహో తెరకెక్కింది. ఇక్కడి నుంచి ప్రభాస్ చేసే ప్రతి సినిమా అదేస్థాయిలో తెరకెక్కుతోంది.