Narendra Modi ఈరోజు మే 10 వ తేదీన కర్ణాటక, తెలంగాణ రాష్ట్రాల్లో పలు కీలక కార్యక్రమాల్లో పాల్గొననున్నట్లు తన సోషల్ మీడియా వేదికగా వెల్లడించారు. ముఖ్యంగా బెంగళూరులో జరిగే ఆర్ట్ ఆఫ్ లివింగ్ కార్యక్రమం, హైదరాబాద్లో భారీ అభివృద్ధి పనుల ప్రారంభోత్సవాలు, బీజేపీ ర్యాలీ రాజకీయంగా ప్రాధాన్యత సంతరించుకోవడంతో ఈ పర్యటనపై ఆసక్తి నెలకొంది.
ఉదయం 11 గంటలకు కర్ణాటకలోని బెంగళూరు కనకపుర రోడ్ వద్ద ఉన్న ఆర్ట్ ఆఫ్ లివింగ్ ఇంటర్నేషనల్ సెంటర్లో నిర్వహించే ప్రత్యేక కార్యక్రమంలో ప్రధాని పాల్గొననున్నారు. ఆర్ట్ ఆఫ్ లివింగ్ సంస్థ స్థాపించి 45 సంవత్సరాలు పూర్తయిన సందర్భంగా ఈ వేడుకలు నిర్వహిస్తున్నారు. సమాజ సేవ, ఆధ్యాత్మిక కార్యక్రమాలు, విద్య, ఆరోగ్య రంగాల్లో సంస్థ అందిస్తున్న సేవలను మోదీ ప్రశంసించారు.
అనంతరం మధ్యాహ్నం హైదరాబాద్ చేరుకోనున్న ప్రధాని, సుమారు రూ. 9,500 కోట్ల విలువైన అభివృద్ధి పనులకు ప్రారంభోత్సవాలు, శంకుస్థాపనలు చేయనున్నారు. రహదారులు, లాజిస్టిక్స్, చేనేత రంగం, రైల్వేలు, ఇంధన రంగాలకు సంబంధించిన పలు ప్రాజెక్టులు ఇందులో భాగంగా ఉండనున్నట్లు తెలిపారు. అలాగే సింధు ఆసుపత్రిని దేశానికి అంకితం చేసే కార్యక్రమంలో కూడా పాల్గొంటారు.
సాయంత్రం హైదరాబాద్లో నిర్వహించే బీజేపీ భారీ ర్యాలీలో ప్రధాని ప్రసంగించనున్నారు. ఈ సందర్భంగా తెలంగాణ రాజకీయాలపై కూడా మోదీ కీలక వ్యాఖ్యలు చేశారు. గతంలో బీఆర్ఎస్ పాలనతో ప్రజలు విసిగిపోయారని, ప్రస్తుతం కాంగ్రెస్ ప్రభుత్వ పనితీరుపై కూడా అసంతృప్తి పెరుగుతోందని పేర్కొన్నారు. రాష్ట్రంలో బీజేపీకి మద్దతు పెరుగుతోందని, తెలంగాణ ప్రజలకు బీజేపీయే మొదటి ఎంపికగా మారుతోందని ఆయన వ్యాఖ్యానించారు.
అభివృద్ధి, రాజకీయ కార్యక్రమాలతో కూడిన ప్రధాని మోదీ పర్యటన ఇప్పుడు తెలంగాణ రాజకీయాల్లో చర్చనీయాంశంగా మారింది.
నేను రేపు, మే 10న, కర్ణాటక, తెలంగాణల్లో వివిధ కార్యక్రమాల్లో పాల్గొంటాను.
ఉదయం 11 గంటలకు, ఆర్ట్ ఆఫ్ లివింగ్ సంస్థ స్థాపించి 45 సంవత్సరాలు పూర్తైన సందర్భంగా నిర్వహించే కార్యక్రమంలో పాల్గొంటాను. సమాజానికి సేవ చేయాలనే మన విలువలకు అనుగుణంగా, ఈ సంస్థ అనేక రంగాల్లో ప్రశంసనీయమైన సేవలు…
— Narendra Modi (@narendramodi) May 9, 2026