మోడీ ఆశీస్సులున్నాయన్నారు.. మరి, ఈ అక్షింతలేంటి.?

ఆంధ్రప్రదేశ్‌ ముఖ్యమంత్రి వైఎస్‌ జగన్‌ మోహన్‌రెడ్డికి ప్రధాని నరేంద్ర మోడీ ఆశీస్సులున్నాయంటూ పదే పదే వైసీపీ నేతలు చెప్పుకుంటున్నారు. మరీ ముఖ్యంగా ‘పీపీఏ’లకు సంబంధించి కేంద్రానికీ, రాష్ట్రానికీ మధ్య వివాదంపై.. వైసీపీ బుకాయింపులు అన్నీ ఇన్నీ కావు. ‘రివర్స్‌ టెండరింగ్‌’ పేరుతో అన్నిటినీ రివర్స్‌ చేస్తోన్న వైఎస్‌ జగన్‌ సర్కార్‌కి, పీపీఏల విషయంలో ఇప్పటికే న్యాయస్థానం మొట్టికాయలేసింది. అయినా, వెనక్కి తగ్గేందుకు ‘అహం’ అడ్డొస్తోంది వైఎస్‌ జగన్‌ సర్కార్‌కి.

ఇదిలా వుంటే, కేంద్రం ఒకటికి పదిసార్లు ఇప్పటికే పీపీఏల రద్దు విషయమై రాష్ట్ర ప్రభుత్వాన్ని హెచ్చరించింది. అయినా, కేంద్రం హెచ్చరికల్ని వైఎస్‌ జగన్‌ ప్రభుత్వం లైట్‌ తీసుకుంది. కాగా, కేంద్ర మంత్రి పీయుష్‌ గోయల్‌, ఆంధ్రప్రదేశ్‌ ప్రభుత్వం.. దేశాన్ని భ్రష్టుపట్టిస్తోందంటూ సంచలన వ్యాఖ్యలు చేయడంతో ఒక్కసారిగా వైసీపీ శ్రేణులు ఉలిక్కిపడ్డాయి.

సరాసరి ఆంధ్రప్రదేశ్‌ పేరు ప్రస్తావించకపోయినా, ‘దక్షిణాదిలో ఓ రాష్ట్రం పీపీఏలపై ప్రతిష్టంభన సృష్టించడంతో దేశం పరువు పోతోంది..’ అని ఆయన పేర్కొనడం.. పరోక్షంగా ఏపీని ఉద్దేశించిందేనన్నది నిర్వివాదాంశం. ఇప్పుడీ అంశం జాతీయ మీడియాలో ఆసక్తికరమైన చర్చకు తెరలేపింది. నేషనల్‌ మీడియాలో ఆంధ్రప్రదేశ్‌ ప్రభుత్వంపై కథనాలు పుంఖానుపుంఖాలుగా దర్శనమిస్తున్నాయి.

కాగా, ఇప్పటిదాకా ‘నరేంద్ర మోడీ ఆశీస్సులున్నాయ్‌..’ అని ప్రచారం చేసుకున్న వైసీపీ నేతలు, తాజా పరిణామాలపై కేంద్ర ప్రభుత్వ పెద్దలతో చర్చించేందుకు సమాయత్తమవుతున్నారట. అయితే, ‘ఇందులో కొత్తగా మాట్లాడటానికేమీ లేదు.. ముందు మీ ఆలోచనల నుంచి వెనక్కి తగ్గండి..’ అంటూ ఢిల్లీ పెద్దలు స్పష్టమైన సంకేతాలు పంపినట్లు తెలుస్తోంది.

కేంద్రం చొరవతో కుదిరే ఒప్పందాల్లో అక్రమాలు జరిగాయంటూ, రాష్ట్ర ప్రభుత్వాలు అత్యుత్సాహం ప్రదర్శిస్తే.. పోయేది రాష్ట్రం పరువు మాత్రమే కాదు, దేశం పరువు కూడా. ఏదిఏమైనా, రాష్ట్రానికి వైఎస్‌ జగన్‌ సర్కార్‌.. మేలు చేయకపోయినా ఫర్లేదుగానీ.. జాతీయ స్థాయిలో రాష్ట్రం పరువు పోకూడదన్నది రాజకీయ విశ్లేషకుల అభిప్రాయం.