బాదుతున్నా.. బుద్ధి రావడంలేదు!

మానవాళి ప్రాణాలను కబళిస్తున్న కరోనా మహమ్మారిని నియంత్రించేందుకు ప్రపంచ దేశాలన్నీ చేయాల్సినదంతా చేస్తున్నాయి. ఈ వైరస్ ను అడ్డుకోవడానికి ఏకైన మార్గం ఇంట్లో ఉండటమే అని నెత్తీ నోరూ బాదుకుని మరీ చెబుతున్నాయి. ప్రజలందరూ లాక్ డౌన్ ను పాటించాలని ముఖ్యమంత్రులు చేతులెత్తి మరీ మొక్కుతున్నారు. పల్లెల్లో అందరూ దీనిని సక్రమంగా పాటిస్తున్నా.. పట్ణణాలు, నగరాలకు వచ్చేసరికి పూర్తిగా అమలు కావడంలేదు. ఇక్కడ 70 నుంచి 90 శాతం మేర మాత్రమే లాక్ డౌన్ పాటిస్తున్నారు. ఇది లాక్ డౌన్ ఉద్దేశాన్ని నీరుగారుస్తోంది.

ప్రభుత్వాలు ఎన్నో వ్యయప్రయాసలకోర్చి నష్టాలను భరించి పిలుపునిచ్చిన లాక్ డౌన్ ను పాటించాల్సిన బాధ్యత ప్రతి పౌరుడిపైనా ఉంది. పెద్దలు, వృద్ధులు బాధ్యతగానే ఉంటున్నా.. యువత మాత్రం లాక్ డౌన్ ను ఉల్లంఘిస్తున్నారు. పనిలేకుండా రోడ్లపైకి వచ్చేవారిలో యువతే ఎక్కువగా ఉంటున్నారు. పోలీసులు లాఠీలు ఝలిపిస్తున్నా కూడా వారి తీరు మారడంలేదు. రోడ్లపైకి వచ్చేవారి తాట తీయడం మన దేశంలోనే కాదు.. పలు దేశాలు కూడా ఇదే బాటలో వెళుతున్నాయి.

ఒక్కో దేశంలో ఒక్కో రకమైన నిబంధన అమల్లోకి తీసుకొచ్చారు. కొన్నిచోట్ల జరిమానాలు వేస్తుండగా.. మరికొన్ని చోట్ల జరిమానాలు, జైలు శిక్ష రెండూ విధిస్తున్నారు. దీంతో పలు చోట్ల పోలీసులు ఓవర్ యాక్షన్ కూడా చేస్తున్నట్టు విమర్శలు వస్తున్నాయి. మనదేశంలో నిబంధనలు ఉల్లంఘించి రోడ్లపైకి వస్తున్నవారి వాహనాలు సీజ్ చేయాల్సి ఉండగా.. పలువురు పోలీసులు వాటిని ఇష్టానుసారం ధ్వంసం చేస్తున్నారు.

ఇక దక్షిణాఫ్రికాలో లాక్ డౌన్ ఉల్లంఘనులపై వాటర్ కెనాన్లు, రబ్బర్ బుల్లెట్లు కూడా ప్రయోగిస్తున్నారు. సింగపూర్, ఆస్ట్రేలియా, మెక్సికో వంటి దేశాల్లో భారీ జరిమానాలు, జైలు శిక్షలు విధిస్తున్నారు. ఫిలిప్పీన్స్ అధ్యక్షుడికి అయితే కోపం నషాళానికి అంటడంతో లాక్ డౌన్ నిబంధనలను ఉల్లంఘించినవారిని కాల్చిపడేయాలని ఆదేశాలు జారీచేశారు. లాక్ డౌన్ అనేది ప్రజల క్షేమం కోసమేనని చెబుతున్నా.. కొంతమంది జనాల చెవికి ఎక్కడంలేదు.

రోడ్లపై పరిస్థితి ఎలా ఉందో చూద్దామని కొందరు.. వీడియోలు తీయడానికి మరికొందరు ఇలా రకరకాల కారణాలతో తిరుగుతున్నారు. పోలీసులు బతిమాలుతున్నా.. లాఠీలకు పనిచెబుతున్నా వీరు మారడంలేదు. లాక్ డౌన్ సరిగా అమలైతే దీనిని పొడిగించే అవసరం ఉండదని, అలా కాకుండా నిబంధనలు ఉల్లంఘిస్తే కరోనా వైరస్ మహమ్మారి ని నిరోధించడం సులభం కాదని హెచ్చరిస్తున్నారు.