శనివారం మంగళగిరిలోని జనసేన కేంద్ర కార్యాలయంలో పార్టీ ముఖ్య నేతలతో పవన్ కళ్యాణ్ సుదీర్ఘంగా సమావేశమయ్యారు. పార్టీ సంస్థాగత నిర్మాణం, కమిటీల ఏర్పాటు, నియోజకవర్గ స్థాయి బలోపేతంపై విస్తృత చర్చ జరిగింది. ఇటీవల నిర్వహించిన జనసేన ఉద్యమి ఆత్మీయ సమావేశంలో ప్రకటించిన అంశాలపై ఈ సమావేశంలో మరింత స్పష్టత ఇచ్చినట్లు పార్టీ వర్గాలు తెలిపాయి.
పార్టీ నిర్ణయం ప్రకారం ప్రతి పార్లమెంట్ నియోజకవర్గానికి ప్రత్యేక కమిటీ ఏర్పాటు చేయనున్నారు. ప్రతి కమిటీలో ఏడుగురు సభ్యులు ఉంటారు. సంబంధిత ప్రాంతానికి చెందిన ఎమ్మెల్యే, ఎంపీ లేదా సీనియర్ నేతతో పాటు మహిళా నాయకులు, 2014 నుంచి పార్టీ కోసం పనిచేస్తున్న నాయకుడు, ఇద్దరు సాధక్లకు ఇందులో అవకాశం కల్పించనున్నారు. అదనంగా 10 నుంచి 25 మంది సాధక్లు సమన్వయ బృందంగా పనిచేయనున్నారు.
ఈ కమిటీలు ఆయా అసెంబ్లీ నియోజకవర్గ కమిటీల్లో స్థానం కోరుకునే వారి నుంచి దరఖాస్తులు, సేవా వివరాలు స్వీకరిస్తాయి. అనంతరం వాటిని సమీకరించి ఒక నివేదిక రూపంలో పార్టీ అధ్యక్షుడు పవన్ కళ్యాణ్కు అందజేస్తాయి. ఆయన నేతృత్వంలో ప్రత్యేకంగా ఏర్పడే కమిటీ ఈ నివేదికలను పరిశీలించి తుది నిర్ణయం తీసుకుంటుంది.
తదనంతరం నియోజకవర్గ ఇన్ఛార్జీలు, కమిటీల సభ్యుల నియామకాలు చేపట్టనున్నారు. పార్లమెంట్ నియోజకవర్గాల వారీగా పత్రాల స్వీకరణ నుంచి కమిటీల ప్రకటన వరకు మొత్తం ప్రక్రియను నాలుగు వారాల్లో పూర్తి చేసేలా కార్యాచరణ సిద్ధం చేయాలని పవన్ కళ్యాణ్ పార్టీ కేంద్ర కార్యాలయానికి ఆదేశించినట్లు సమాచారం.
పార్టీ స్థాయిలో క్రియాశీలకంగా పనిచేసిన క్యాడర్కు గుర్తింపు కల్పిస్తూ, కింది స్థాయి కార్యకర్తలను నాయకత్వ స్థానాలకు తీసుకురావడమే ఈ కార్యక్రమం ప్రధాన లక్ష్యంగా జనసేన పార్టీ చెబుతోంది.