ఢిల్లీ పర్యటనలో భాగంగా మంగళవారం కేంద్ర మంత్రిని కలిసిన పవన్ కళ్యాణ్, గోదావరి నది కాలుష్య నివారణ, పుష్కరాల ఏర్పాట్లు, మౌలిక సదుపాయాల అభివృద్ధి వంటి అంశాలపై సుదీర్ఘంగా చర్చించారు. అనంతరం మీడియాతో మాట్లాడిన ఆయన, దేశం నలుమూలల నుంచి కోట్లాది మంది భక్తులు గోదావరి పుష్కరాలకు హాజరవుతారని, వారికి పరిశుభ్రమైన గోదావరిని అందించాలన్నదే రాష్ట్ర ప్రభుత్వ లక్ష్యమని తెలిపారు.
గోదావరిలో శుద్ధి చేయని మురుగునీరు, ఘన మరియు ద్రవ వ్యర్థాలు కలవడం వల్ల కాలుష్యం పెరుగుతోందని పవన్ కళ్యాణ్ పేర్కొన్నారు. ఈ సమస్యలను పరిష్కరించేందుకు మరిన్ని మురుగునీటి శుద్ధి కేంద్రాల ఏర్పాటు అవసరమని, నదిలోకి కాలుష్య జలాలు చేరకుండా ప్రత్యేక చర్యలు తీసుకోవాలని కేంద్రాన్ని కోరినట్లు చెప్పారు. కాలుష్యానికి ప్రధాన కారణాలపై సమగ్ర అధ్యయనం చేసి నివారణ చర్యలపై కేంద్ర మంత్రితో చర్చించినట్లు వెల్లడించారు.
గోదావరి పుష్కరాలకు ముందే నదిని శుభ్రపరిచే కార్యాచరణను అమలు చేయాలని రాష్ట్ర ప్రభుత్వం నిర్ణయించిందని, దీనికి కేంద్రం కూడా సహకారం అందిస్తామని జల్ శక్తి మంత్రి హామీ ఇచ్చినట్లు పవన్ కళ్యాణ్ తెలిపారు. కాలుష్యరహిత పుష్కరాల నిర్వహణకు సంబంధించిన సమగ్ర నివేదికను కేంద్రానికి అందించామని, రాష్ట్ర ప్రభుత్వ విజన్ను కేంద్ర మంత్రి అభినందించినట్లు చెప్పారు.
పుష్కరాల కోసం మోడల్ పంచాయతీల అభివృద్ధి, భక్తుల రద్దీ నియంత్రణ, సౌకర్యాల కల్పన అంశాల్లో ఆంధ్రప్రదేశ్ ప్రభుత్వం రూపొందించిన ప్రణాళికలను కూడా కేంద్ర మంత్రి ప్రశంసించినట్లు వెల్లడించారు. సూరత్, వారణాసి, ప్రయాగ్రాజ్ వంటి నగరాల్లో భారీ ఆధ్యాత్మిక కార్యక్రమాల నిర్వహణలో అనుసరించిన విధానాలను గోదావరి పుష్కరాల్లో అమలు చేసేందుకు కేంద్ర సహకారం కోరినట్లు తెలిపారు.
అలాగే జల్ జీవన్ మిషన్ అమలుకు మరింత ఆర్థిక, సాంకేతిక సహకారం అందించాలని కేంద్ర ప్రభుత్వాన్ని కోరినట్లు పవన్ కళ్యాణ్ చెప్పారు. గోదావరి నది పరిరక్షణతో పాటు గ్రామీణ ప్రాంతాల్లో తాగునీటి, పారిశుధ్య వ్యవస్థలను బలోపేతం చేయడమే రాష్ట్ర ప్రభుత్వ ప్రధాన లక్ష్యమని ఆయన స్పష్టం చేశారు.