జనసేనాని ‘నవ్వు’ వెనుక ‘పొత్తు’ రాజకీయమేంటి.?

తెలుగుదేశం పార్టీ పంచన జనసేన పార్టీ చేరబోతోందంటూ వైసీపీ నేతలు పేలిన అవాకులు చెవాకులు అన్నీ ఇన్నీ కావు. ‘భీమ్లానాయక్ కాదు బిచ్చం నాయక్..’ అంటూ ఓ మాజీ మంత్రి ప్రేలాపనల్ని చూశాం. ఇంతకీ, పొత్తుల విషయమై జనసేన అధినేత ఏం ఆలోచిస్తున్నట్టు.? వైసీపీ వ్యతిరేక ఓటు చీల్చకూడదు.. అంటూ గతంలో పవన్ కళ్యాణ్ చేసిన వ్యాఖ్యలకు అర్థమేంటి.?

తాజాగా జనసేన అధినేత పవన్ కళ్యాణ్, జనంలోకి వెళ్ళారు.. పొత్తుల వ్యవహారానికి సంబంధించి ఇంకాస్త క్లారిటీ ఇచ్చారు. ‘వైసీపీ వ్యతిరేక ఓటు చీలకూడదు’ అని తాను చెప్పడానికి కారణం వైసీపీయేనని జనసేనాని వ్యాఖ్యానించడం వైసీపీ వర్గాల్లో కలకలం రేపుతోంది.

‘వైసీపీ ఇంకోసారి అధికారంలోకి వస్తే రాష్ట్రం తీవ్రంగా నష్టపోతుంది.. మహిళలకు రక్షణ లేకుండా పోతోంది.. హోంమంత్రి ఈ విషయమై చాలా తేలిగ్గా మాట్లడుతున్నారు.. ఇలాంటి ప్రభుత్వం ఇంకోసారి అధికారంలోకి రావాలని ఎవరైనా కోరుకుంటారా.?’ అంటూ జనసేనాని పవన్ కళ్యాణ్ తాజాగా వ్యాఖ్యానించారు.

ఈ క్రమంలో జనసేన అధినేత పవన్ కళ్యాణ్, మీడియా ప్రశ్నలు సంధించినప్పుడు నవ్వుతూ కనిపించారు. ఆ నవ్వు వెనుక అర్థమేంటి.? పవన్ కళ్యాణ్ ధీమా ఏంటి.? అన్నదానిపై రాజకీయ వర్గాల్లో ఆసక్తికరమైన చర్చ జరుగుతోంది.

‘ఏదో ఊరికే, వైసీపీ వ్యతిరేక ఓటు చీలిపోకూడదని నేను అనలేదు.. దాని వెనుక చాలా అర్థం వుంది.. చూద్దాం, ఎవరెవరు కలిసి వస్తారో ఈ విషయంలో..’ అని పవన్ కళ్యాణ్ చెప్పారు. దానర్థం, జనసేన పార్టీతోనే ఎవరైనా కలవాలి తప్ప, జనసేన ఎవరితోనూ స్వచ్ఛందంగా కలవదనే సంకేతం పవన్ కళ్యాణ్ ఇచ్చేసినట్టే కదా.?

దీన్ని షరామామూలుగానే ‘ట్విస్ట్’ చేస్తూ వైసీపీ ‘మంద’ మొరగడం మామూలే. ఆ రాజకీయ విమర్శల సంగతి పక్కన పెడితే, జనసేన వ్యూహం అర్థం కాక వైసీపీ అధిష్టానానికి మైండ్ బ్లాంక్ అయిపోతోందిప్పుడు. ‘151 సీట్లు వచ్చాయని విర్రవీగుతున్నారేమో.. వచ్చే ఎన్నికల్లో 15 సీట్లు కూడా రావు’ అని పవన్ కళ్యాణ్ తేల్చేయడంతో వైసీపీలో విస్తృత చర్చ జరుగుతోంది.