చంద్రబాబు ప్రేమబాణాన్ని జనసేనాని తిరస్కరించినట్లేనా.?

ఇది మామూలు కరువు కాదు.. బీభత్సమైన కరువు.. తెలుగుదేశం పార్టీకి సంబంధించి. అందుకే, పొత్తుల కోసం చంద్రబాబు ఆరాటం అప్పుడే షురూ అయ్యింది. ప్రేమ బాణాల్ని సంధిస్తున్నాం, అటు వైపు నుంచి సరైన సమాధానం రావడంలేదంటూ ఈ మధ్యనే వాపోయారు టీడీపీ అధినేత నారా చంద్రబాబునాయుడు.

కొత్తగా పొత్తు పెట్టుకోవడానికి టీడీపీ అధినేత నారా చంద్రబాబునాయుడికి తెలుగునాట రాజకీయాల్లో మిగిలిన ఒకే ఒక్క పార్టీ వైఎస్సార్ కాంగ్రెస్ పార్టీ. పైకి కత్తులు దూస్తున్నా, తెరవెనుకాల టీడీపీ – వైసీపీ మధ్య 60-40 అవగాహన కొనసాగుతోందన్నది బహిరంగ రహస్యం.

లేకపోతే, గడచిన రెండున్నరేళ్ళలో టీడీపీ అధినేత చంద్రబాబుకి జైలు తప్పదంటూ వైసీపీ సర్కారు బీరాలు పలకడం మినహా, సాధించిందేంటి.? అంతకుముందు టీడీపీ హయాంలో.. ‘వైఎస్ జగన్ ఆస్తుల్ని జప్తు చేస్తాం.. అక్రమంగా దోచేసిన సొమ్ముని ప్రభుత్వ ఖజానాకి చేరుస్తాం..’ అంటూ చంద్రబాబు సహా చాలామంది అప్పటి మంత్రులు సెలవిచ్చారు. కానీ, ఏం జరిగింది.?

సరే, టీడీపీ – వైసీపీ మధ్య ‘రాజకీయ అవగాహన’ని పక్కన పెడదాం. చంద్రబాబు, గత కొంతకాలంగా జనసేన మీదకు వలపు బాణాల్ని సంధిస్తున్నారు. ‘అటు వైపు నుంచి స్పందన రావడంలేదు.. మనమేం చేస్తాం.?’ అంటూ నిర్వేదం కూడా ప్రదర్శించారు ఇటీవల సొంత జిల్లా పర్యటన సందర్భంగా ఎదురైన ఓ ప్రశ్నకు సమాధానమిస్తూ. ప్రశ్న అడిగించింది ఆయనే, సమాధానం చెప్పిందీ ఆయనే.

ఇక, చంద్రబాబు పొత్తుల కోసం వెంపర్లాడుతున్న వైనంపై జనసేన అధినేత స్పందించాల్సి వచ్చింది. ‘ఇప్పుడు పొత్తుల గురించి ఆలోచించే పరిస్థితి లేదు. పార్టీని బలోపేతం చేసుకుందాం. పొత్తుల నిర్ణయం నేనొక్కడినే తీసుకోను. అందర్నీ సంప్రదించాకే నిర్ణయం తీసుకుందాం. ప్రస్తుతానికైతే బీజేపీ – జనసేన మధ్య పొత్తు కొనసాగుతోంది..’ అని క్లారిటీ ఇచ్చేశారు జనసేనాని.

నిజానికి, పవన్ స్పందించకపోతే.. తెలుగుదేశం పార్టీ మరింతగా జనసేన మీద పొత్తుల పేరుతో దుష్ప్రచారం చేసేసేదే. ఇప్పటికే, జనసేన పోటీ చేయబోయే నియోజకవర్గాల్ని టీడీపీ అనుకూల మీడియా ఖరారు చేసేస్తోంది నిస్సిగ్గుగా.

ఏదిఏమైనా, చంద్రబాబు వలపు బాణాల్ని జనసేన నిర్ద్వంద్వంగా తిరస్కరించినట్లయ్యిందనే భావించాలి ప్రస్తుతానికి.