సినీ రంగం, రాజకీయాలు మాత్రమే కాకుండా మార్షల్ ఆర్ట్స్లోనూ తన ప్రత్యేకతను చాటుకుంటున్న పవన్ కళ్యాణ్ మరో అరుదైన ఘనతను సాధించారు. ప్రాచీన జపనీస్ కత్తిసాము యుద్ధకళ అయిన ‘కెంజుట్సు’లో ఆయనకు అధికారికంగా ప్రవేశం లభించడం అంతర్జాతీయ స్థాయిలో చర్చనీయాంశంగా మారింది. మూడు దశాబ్దాలకు పైగా ఆయన సాగించిన క్రమశిక్షణతో కూడిన సాధన, లోతైన అధ్యయనం, యుద్ధకళల పట్ల ఉన్న నిబద్ధతకు ఇది గొప్ప గుర్తింపుగా మారింది.
సినిమాల్లోకి, రాజకీయాల్లోకి అడుగుపెట్టకముందే పవన్ కళ్యాణ్ మార్షల్ ఆర్ట్స్ ప్రయాణం ప్రారంభమైంది. చెన్నైలో ఉన్న సమయంలో కరాటే సహా పలు యుద్ధకళల్లో కఠినమైన శిక్షణ పొందిన ఆయన, శారీరక సాధనతో పాటు జపనీస్ సమురాయ్ సంప్రదాయాలు, యుద్ధ తత్వశాస్త్రంపై లోతైన అవగాహనను సంపాదించారు. కాలక్రమేణా ఈ జ్ఞానం ఆయన సినిమాల్లోనూ ప్రతిఫలించింది. యాక్షన్ సన్నివేశాల్లో కనిపించే క్రమశిక్షణ, శైలి వెనుక ఈ మార్షల్ ఆర్ట్స్ సాధనే ప్రధాన కారణంగా చెప్పుకుంటారు అభిమానులు.
పవన్ కళ్యాణ్ మార్షల్ ఆర్ట్స్ పట్ల చూపిన దీర్ఘకాలిక అంకితభావాన్ని గుర్తించిన జపాన్కు చెందిన ప్రతిష్ఠాత్మక సంస్థలు ఆయనకు పలు గౌరవాలు అందించాయి. జపాన్ సంప్రదాయ యుద్ధకళల్లో గౌరవనీయమైన ‘సోగో బుడో కన్రి కై’ సంస్థ నుంచి ఆయనకు ఫిఫ్త్ డాన్ (ఐదవ డాన్) పురస్కారం లభించింది. అలాగే, జపాన్ వెలుపల టకెడా షింగెన్ క్లాన్లో ప్రవేశం పొందిన తొలి తెలుగు వ్యక్తిగా పవన్ కళ్యాణ్ చరిత్ర సృష్టించారు. ఇది జపాన్ బయట వ్యక్తులకు చాలా అరుదుగా లభించే గౌరవంగా మార్షల్ ఆర్ట్స్ వర్గాలు పేర్కొంటున్నాయి.
ఇదే క్రమంలో గోల్డెన్ డ్రాగన్స్ సంస్థ ఆయనను “టైగర్ ఆఫ్ మార్షల్ ఆర్ట్స్” అనే విశిష్ట బిరుదుతో సత్కరించింది. భారతదేశంలో జపాన్ యుద్ధకళల నిపుణుడిగా పేరుగాంచిన హాన్షి ప్రొఫెసర్ డాక్టర్ సిద్ధిక్ మహ్మూదీ వద్ద పవన్ కళ్యాణ్ అధునాతన శిక్షణ పొందారు. ఆయన మార్గదర్శకత్వంలో కెండోలోనూ సమగ్ర శిక్షణ తీసుకుని, సాంకేతిక నైపుణ్యంతో పాటు లోతైన తాత్విక అవగాహనను పెంపొందించుకున్నారు.
కెంజుట్సులో అధికారిక ప్రవేశంతో పవన్ కళ్యాణ్ సినిమా, యుద్ధకళలు, యుద్ధ తత్వశాస్త్రాన్ని అంతర్జాతీయ వేదికపై సమన్వయం చేసిన అరుదైన భారతీయ ప్రముఖుల జాబితాలో నిలిచారు. ఇది ఒక వ్యక్తిగత గౌరవంగా మాత్రమే కాకుండా, క్రమశిక్షణ, వినయం, నిరంతర అభ్యాసం వంటి విలువలకు ప్రతీకగా మారింది. మార్షల్ ఆర్ట్స్ సాధకులకే కాదు, ఆయన అభిమానులకు కూడా ఈ ఘనత ప్రేరణగా నిలుస్తోంది.