చిరంజీవితో పవన్‌ భేటీ.. తెరవెనుక ఏం జరుగుతోంది.!

మెగాస్టార్‌ చిరంజీవితో, పవర్‌ స్టార్‌ పవన్‌ కళ్యాణ్‌ భేటీ అయ్యాడు. అన్నదమ్ములిద్దరూ కలిస్తే, అందులో వింతేముంది.? కుటంబ విషయాలతోపాటు, రాజకీయాలు కూడా చర్చకు రావొచ్చుగాక. కానీ, ఇక్కడ మేటర్‌ అంతకు మించి వుంది. ఈ భేటీలో జనసేన ముఖ్య నేతల్లో ఒకరైన నాదెండ్ల మనోహర్‌ కూడా వున్నారు. జనసేన అధినేత పవన్‌తోపాటు, నాదెండ్ల మనోహర్‌, చిరంజీవితో భేటీ అవడాన్నీ ప్రత్యేకంగా చూడాల్సిన పనేలేదేమో.

ఇందులోనూ మరో ట్విస్ట్‌ వుంది. నాదెండ్ల మనోహర్‌ తండ్రి, మాజీ ముఖ్యమంత్రి నాదెండ్ల భాస్కరరావు ఇటీవలే భారతీయ జనతా పార్టీలో చేరారు. మరోపక్క, చిరంజీవితో భారతీయ జనతా పార్టీ నేతలు సంప్రదింపులు జరుపుతున్నారనే ప్రచారం జరుగుతోంది. వీటన్నిటికీ తోడు, బీజేపీ ముఖ్య నేత ఒకరితో ఇటీవల తానా సభల సందర్భంగా అమెరికాలో పవన్‌ కళ్యాణ్‌ భేటీ అయినట్లు ఊహాగానాలు వచ్చాయి. ఒకదాన్నొకటి ఇంటర్‌ లింక్‌ చేస్తే, చిరంజీవితో పవన్‌ కళ్యాణ్‌, నాదెండ్ల మనోహర్‌ భేటీని తేలిగ్గా తీసి పారేయలేం. చాలా అంశాలు చర్చకు వచ్చాయంటూ స్వయంగా నాదెండ్ల మనోహర్‌, చిరంజీవి – పవన్‌ కళ్యాణ్‌లతోపాటు వున్న ఫొటో సోషల్‌ మీడియాలో పోస్ట్‌ చేశారు. సో, మేటర్‌ క్లియర్‌.

అక్కడ వ్యవహారం ఏదో సీరియస్‌గానే వుంది. ఇంట్రెస్టింగ్‌ పొలిటికల్‌ డెవలప్‌మెంట్‌కి ఆస్కారం స్పష్టంగా కనిపిస్తోంది. చిరంజీవి, బీజేపీ వైపుకు వెళతారా.? తనతోపాటు తన తమ్ముడినీ చిరంజీవి, బీజేపీలోకి తీసుకెళ్ళబోతున్నారా.? అన్న చర్చ జరగడం సహజమే. అయితే, తమ్ముడు పవన్‌ కళ్యాణే అన్నయ్య చిరంజీవి సాయాన్ని కోరారనీ, తెలుగు రాష్ట్రాల్లో జనసేనను బలోపేతం చేసేందుకు తగిన సలహాలు ఇవ్వాలని అడిగారనీ ఇంకో వాదన విన్పిస్తోంది.

ప్రజారాజ్యం పార్టీ స్థాపించి, దాన్ని కాంగ్రెస్‌లో కలిపేసి, కేంద్ర మంత్రిగా కొన్నాళ్ళు పనిచేసిన చిరంజీవి, ప్రస్తుతం రాజకీయాలకు దూరంగా వుంటున్నారు. కానీ, రాజకీయాల్లో ఆయన ఇమేజ్‌ అనూహ్యంగా ఇప్పుడిప్పుడే పెరుగుతోంది. తెలుగు రాష్ట్రాలకు చిరంజీవి, కేంద్ర మంత్రి హోదాలో చేసిన మంచి పనుల గురించి, వివిధ రాజకీయ పార్టీలకు చెందిన నేతలు చెబుతున్నారు. సో, ముందు ముందు చిరంజీవి తెలుగు నాట రాజకీయాల్లో సెంటరాఫ్‌ ఎట్రాక్షన్‌ అవడం ఖాయమే అనుకోవాలి.