త్రివిక్రమ్‌ తర్వాత డాలీకే ఆ ఛాన్స్‌

టాలీవుడ్‌లో పవర్‌ స్టార్‌ పవన్‌ కళ్యాణ్‌కు ఉన్నతం క్రేజ్‌ మరో హీరోకు లేదేమో అనిపిస్తుంది. అంతటి ఫ్యాన్‌ ఫాలోయింగ్‌ను కలిగి ఉన్న పవన్‌ కళ్యాణ్‌తో ప్రతి దర్శకుడు కూడా సినిమా చేయాలని పరితపిస్తూ ఉంటాడు. ఒకానొక సమయంలో రాజమౌళి కూడా పవన్‌తో సినిమా చేసేందుకు తీవ్రంగా ప్రయత్నాలు చేశానంటూ చెప్పుకొచ్చాడు. కాని పవన్‌తో సినిమా చేయడంకు వీలు పడలేదంటూ ఇటీవలే ఒక ఇంటర్వ్యూలో స్వయంగా రాజమౌళి చెప్పుకొచ్చాడు.

పవన్‌తో ఒక్కటి రెండు సినిమాలు చేసే అవకాశం రావడం గొప్ప అనుకుంటే మాటల మాంత్రికుడు త్రివిక్రమ్‌ ఏకంగా మూడు సినిమాలు చేశాడు. వీరిద్దరి కాంబోలో వచ్చిన జల్సా మరియు అత్తారింటికి దారేది చిత్రాలు ఇండస్ట్రీ హిట్‌గా నిలిచాయి. అజ్ఞాతవాసి మాత్రం ఫ్లాప్‌ అయ్యింది. మళ్లీ వీరి కాంబో మూవీ కోసం ఎదురు చూస్తున్నారు. పవన్‌ మళ్లీ సినిమాలు చేస్తున్న కారణంగా వీరిద్దరి కాంబోలో నాల్గవ సినిమా కూడా వచ్చే అవకాశం ఉంది. త్రివిక్రమ్‌ తర్వాత పవన్‌తో మూడు సినిమాలు తీసిన దర్శకుడి జాబితాలో డాలీ చేరబోతున్నాడు.

ఇప్పటి వరకు డాలీ దర్శకత్వంలో గోపాల గోపాల మరియు కాటమరాయుడు చిత్రాలను పవన్‌ చేశాడు. ఆ రెండు సినిమాలు యావరేజ్‌గా నడిచినా కూడా దర్శకుడు డాలీపై ఉన్న గౌరవం మరియు అభిమానంతో మళ్లీ ఆయన దర్శకత్వంలో సినిమాను చేసేందుకు పవన్‌ ఓకే చెప్పినట్లుగా సమాచారం అందుతోంది. విశ్వసనీయంగా అందుతున్న సమాచారం ప్రకారం ఇటీవల పవన్‌ను కలిసిన డాలీ స్టోరీ చెప్పాడని, ఆ స్టోరీ కూడా బాగా నచ్చడంతో నటించేందుకు ఒప్పుకున్నట్లుగా తెలుస్తోంది. అయితే ఇప్పటికే కమిట్‌ అయిన వకీల్‌ సాబ్‌, క్రిష్‌ మూవీ విరూపాక్షతో పాటు హరీష్‌ శంకర్‌తో సినిమా పూర్తి అయితే అప్పుడు డాలీతో పవన్‌ సినిమా ఉంటుందట. వచ్చే ఏడాదిలో వీరి కాంబో ఉండే అవకాశం ఉంది. మొత్తానికి డాలీ చాలా లక్కీ అంటూ ఇతర దర్శకులు అసూయ పడుతున్నారట.