పవన్ కల్యాణ్ బర్త్ డే స్పెషల్: టాలీవుడ్ తారకమంత్రం.. పేరులోనే వైబ్రేషన్స్.. ‘పవన్ కల్యాణ్’

‘పవన్ కళ్యాణ్.. ఈ పేరులోనే వైబ్రేషన్స్ ఉన్నాయి ‘ అని అష్ఠా చమ్మా సినిమాలో ఉన్న ఒక్క డైలాగ్ కే అప్పట్లో థియేటర్లు దద్దరిల్లిపోయాయి 2008లో. అప్పటికీ.. ఇప్పటికీ కాలంలో మార్పు, పవన్ వయసులో మార్పు వచ్చిందే కానీ.. ఆయన క్రేజ్, ఇమేజ్ మాత్రం ఇంకా.. ఇంకా పెరుగుతూనే ఉంది. పవన్ కళ్యాణ్ పేరు వినగానే ఫ్యాన్స్ వైబ్రేషన్స్ చూసే బాహుబలి -2 ఇంటర్వెల్ సీన్ రాసుకున్నానని కథా రచయిత విజయేంద్రప్రసాద్ అన్నారు. ఈ ఒక్క మాట చాలదా.. పవన్ కళ్యాణ్ మేనియా ఏంటో చెప్పేందుకు..! పవన్ కళ్యాణ్ కు వీరాభిమాని ఎవరు అని ఆఫ్ లైన్ పోల్ పెడితే.. నేనంటే నేనంటూ పోటీలు పడే స్ధాయిలో ఆయన క్రేజ్ ఉంది. పవన్ కళ్యాణ్ అంటే ఎందుకంత ఇష్టం అంటే.. హీరోయిజం, ఛారిటీ, మానవత్వం, ఆయన స్టైల్, సింప్లిసిటీ.. ఇలా ఎన్నో చెప్తారు. నేడు పవన్ కల్యాణ్ పుట్టినరోజు.

తమ్ముడు, జల్సాల జాతర..

జల్సా సినిమాలో హీరో మందు ఇష్టం.. వారం రోజుల్లో ఏయే రోజు ఎలా ఆలోచిస్తాడని మహేశ్ వాయిస్ ఓవర్ ఉంటుంది. సెప్టెంబర్ 2 కోసం ఆయన ఫ్యాన్స్ వెయిటింగ్ కూడా అంతే. సెప్టెంబర్ 3 నుంచే మళ్లీ ఏడాది సెప్టెంబర్ 2 కోసం వెయిటింగ్ మొదలవుద్ది. ఫ్యాన్స్ కి పవన్ కళ్యాణ్ ఇచ్చే కిక్కు కూడా అదే. దీనిని నిజం చేస్తూ.. పవన్ బర్త్ డే సందర్భంగా 23 ఏళ్ల క్రితం విడుదలైన తమ్ముడు సినిమాని ఆగస్టు 30, 31 తేదీల్లో తెలుగు రాష్ట్రాల్లో వేస్తే.. ఆయన కొత్త సినిమా విడుదలకు చేసినంత హడావిడితో థియేటర్లు దద్దరిల్లిపోయాయి.. సెప్టెంబర్ 1,2 తేదీల్లో జల్సా ప్రపంచవ్యాప్తంగా 500లకు పైగా స్క్రీన్లలో ప్రదర్సిస్తున్నారు. అన్ని చోట్లా హౌస్ ఫుల్స్. ఏ థియేటర్ దగ్గర చూసినా పవన్ జాతర. ఈస్థాయి క్రేజ్ ఇండస్ట్రీ, ట్రేడ్.. ఎవరికీ అర్థం కావట్లేదంటే అతిశయోక్తి కాదు.

పవన్ బిజీ బిజీ..

పవన్ కళ్యాణ్.. పవన్ కళ్యాణ్..! నాలుగు రోజులుగా తెలుగు రాష్ట్రాల్లో రెగ్యులర్ సినిమాల హడావిడి పక్కకెళ్ళి.. పవన్ పాత సినిమాల పండుగ నడుస్తోంది. పవన్ మాత్రం.. ఓవైపు సినిమాలు, మరోవైపు రాజకీయాలతో బిజీ బిజీ. సినిమాలు చేస్తూనే.. 2024లో జనసేనను అధికారంలోకి తీసుకొచ్చేందుకు ఇప్పటినుంచే ప్రణాళికలు వేస్తున్నారు. అర్జునుడిని నడిపించిన కృష్ణుడిలా.. జనసైనికులు, వీర మహిళలను నడిపిస్తున్నారు. పవన్ భావజాలమే వారికి శక్తి. జనసైనికులే పవన్ కు కొండంత అండ. పవన్ వ్యక్తిత్వం అభిమానులనే కాదు.. ప్రజలను కూడా ఆకర్షిస్తోంది. సినిమాలతో అభిమానులను అలరిస్తూ.. ప్రజా నాయకుడిగా ప్రజలకు చేరువ కావాలని.. తన ప్రయాణంలో, లక్ష్య సాధనలో విజయం సాధించాలని.. పవన్ కళ్యాణ్ కు పుట్టినరోజు శుభాకాంక్షలు చెప్తోంది ‘ తెలుగు బులెటిన్ ‘.