విశాఖలో జనసేనాని.! అరెస్టుల పర్వం వెనుక అసలు కోణమేంటి.?

జనసేన అధినేత పవన్ కళ్యాణ్ విశాఖపట్నం వెళ్ళారు. అభిమానులు పెద్ద సంఖ్యలో ఆయనకు ఘనస్వాగతం పలికారు. ‘దమ్ముంటే విశాఖ వచ్చి చూడు..’ అని ఒక వైసీపీ నేత, ‘విశాఖ వస్తే తరిమి కొడ్తాం’ అని ఇంకో నాయకుడు.. ఇలా జనసేన శ్రేణుల్ని రెచ్చగొట్టేందుకు పవన్ కళ్యాణ్‌పై మాటలు తూలారు. వైసీపీ మంత్రులు కేవలం పవన్ కళ్యాణ్‌ని విమర్శించడానికీ, పవన్ కళ్యాణ్ అభిమానుల్ని రెచ్చగొట్టేందుకే విశాఖ వెళ్ళారు తప్ప, విశాఖలో నాన్ పొలిటికల్ జేఏసీ నిర్వహించిన గర్జన కోసం కాదని నిన్నటి హంగామాతో తేలిపోయింది.

జనసైనికులు సంయమనం పాటించారు.. కానీ, కొందరు వైసీపీ కేటుగాళ్ళు జనసేన జెండాలు పట్టుకుని ‘పైనుంచి వచ్చిన ఆదేశాల మేరకు’ అలజడి సృష్టించారు. ఈ క్రమంలో మంత్రుల మీద దాడి జరిగిందంటూ వైసీపీ హంగామా షురూ చేసింది. విమానాశ్రయానికి వెళ్ళేందుకు ప్రయాణీకులు ఇబ్బందులు పడ్డారంటూ ఆ కోణంలో కొన్ని కేసులు నమోదయ్యాయి. మంత్రులపై హత్యాయత్నం.. అనే కోణంలోనూ కేసులు నమోదు చేశారట.

‘ఎవడ్నీ వదిలి పెట్టం..’ అంటూ జనసేనకు నేరుగానే కొందరు మంత్రులు వార్నింగ్ ఇవ్వడం, దానికి అనుగుణంగా పోలీసులు కేసులు నమోదు చేయడం.. ఇదంతా ఓ ప్రసహనంగా తయారైంది. అర్థరాత్రి జనసేన అధినేత పవన్ కళ్యాణ్ బస చేసిన హోటల్ వద్దకు పెద్ద సంఖ్యలో పోలీసులు వచ్చారు. పలువురు జనసేన నేతల్ని ఈ సందర్భంగా పోలీసులు అదుపులోకి తీసుకున్నారు.

‘పవన్ కళ్యాణ్‌ని కూడాఅ రెస్టు చేస్తారట.. విశాఖ వెళ్ళిపోదాం పదండి..’ అంటూ సోషల్ మీడియా వేదికగా జనసైనికులు సమాచారం పంపుకున్నారు. తెలుగు రాష్ట్రాల నుంచి పెద్ద సంఖ్యలో జనసైనికులు వెళితే, విశాఖలో పరిస్థితి ఎలా వుండేదో అర్థం చేసుకోవచ్చు.

‘పోలీసులు కవ్వింపు చర్యలకు దిగుతున్నారు.. పవన్ కళ్యాణ్ అరెస్టు జరుగుతుందనేలా హంగామా చేసి, అటువైపు ఎవరు వచ్చినా అరెస్టు చేసేందుకు ప్రణాళిక సిద్ధం చేశారు. అటువైపుగా ప్రస్తుతానికి ఎవరూ వెళ్ళొద్దు..’ అంటూ అభిమానులే మళ్ళీ తమకు తాము సర్దిచెప్పుకోవడంతో, ఎలాంటి అవాంఛనీయ సంఘటనలూ జరగలేదు.

అయినాగానీ, ఇప్పటికీ విశాఖపట్నం నివురుగప్పిన నిప్పులానే వుంది. ఏ క్షణాన అయినా పవన్ కళ్యాణ్‌ని అరెస్టు చేయొచ్చరంటూ ప్రచారం జరుగుతున్న వేళ, జనసైనికులు అత్యంత వ్యూహాత్మకంగా వ్యవహరిస్తున్నారు. ఇంతకీ, పోలీసులు నమోదు చేసే కేసులు, ఈ క్రమంలో జరుగుతున్న అరెస్టుల వల్ల ఒరిగేదేంటి.?

కారు డ్రైవర్‌ని చంపేసిన ఎమ్మెల్సీ అధికార పార్టీ నాయకుడు గనుక అరెస్టు చేయడానికి హైడ్రామా నడిచింది. హిందూపురంలో వైసీపీ నేతని వైసీపీ నాయకులే చంపించేసిన ఘటనలో చట్టపరమైన చర్యలేంటో ఇప్పటికీ ఎవరికీ తెలియదు. కానీ, విశాఖలో జనసైనికులు, పవన్ కళ్యాణ్ అభిమానులు ఏదో హంగామా చేశారని.. రాత్రికి రాత్రి అరెస్టులు చేయడం ద్వారా సభ్య సమాజానికి పోలీసు శాఖ ఏం సంకేతాలు పంపుతోందో ఏమో.!