మాస్ కా దాస్ విశ్వక్ సేన్ నుండి వస్తోన్న లేటెస్ట్ మూవీ ఓరి దేవుడా. తమిళ చిత్రం ఓ మై కడవులే కు రీమేక్ గా తెరకెక్కిన ఈ చిత్రం ఈరోజే ప్రేక్షకుల ముందుకు వచ్చింది. మరి ఈ సినిమా ఎలా ఉందో చూద్దామా?
కథ:
ఓరి దేవుడా కథ మొత్తం అజయ్ పాత్ర చుట్టూ తిరుగుతుంది. అజయ్, అను బెస్ట్ ఫ్రెండ్స్. కొన్నాళ్ల తర్వాత అను, అజయ్ కు ప్రపోజ్ చేస్తుంది. దాంతో వారిద్దరూ పెళ్లి చేసుకుంటారు. అయితే సంవత్సరం తర్వాత డివోర్స్ కు అప్లై చేస్తారు. అయితే కోర్టులో ఏం జరుగుతుంది అనేది ఒక అజ్ఞాత వ్యక్తి అజయ్ కు చెప్తాడు.
ఆశ్చర్యపోయిన అజయ్ ఈసారి ఏం చేస్తాడు? అసలు ఆ అజ్ఞాతవ్యక్తికి జరగబోయేది ముందే ఎలా తెలుస్తుంది? ఇంతకీ అజయ్, అనుల డివోర్స్ ఏమైంది?
నటీనటులు:
ఈ సినిమా విశ్వక్ సేన్ కెరీర్ కు కచ్చితంగా ఉపయోగపడుతుంది. ఎమోషనల్ సీన్స్ లో విశ్వక్ చాలా బాగా చేసాడు. మొత్తం చిత్రాన్ని తన భుజాలపై మోసాడనే చెప్పాలి. ఇక హీరోయిన్ మిథిలా పాల్కర్ కూడా చాలా బాగా చేసింది. తన పాత్రకు పూర్తి న్యాయం చేసింది.
ఇక వెంకటేష్, రాహుల్ రామకృష్ణ పాత్రలు ఎప్పుడూ తెరపై కనిపించినా ఎంటర్టైన్ చేస్తాయి. వెంకటేష్ ఎప్పటిలానే ఫోకస్ తన మీద నుండి పోకుండా ఉంచాడు. రాహుల్ కూడా బాగా చేసాడు.
సాంకేతిక నిపుణులు:
ఇదేమి పూర్తిగా కొత్త కథ కాదు, కాకపోతే రచయిత కమ్ దర్శకుడు అశ్వత్ మరిముత్తు స్క్రీన్ ప్లే ను రెఫ్రెషింగ్ గా రాసుకోగలిగాడు. కథను నాన్-లినియర్ స్టైల్ లో చెప్పడం బాగుంది. ఇక దర్శకుడిగా కూడా అశ్వత్ రాణించాడు. ఎమోషన్స్ ను సరిగ్గా స్క్రీన్ పైకి తీసుకురావడంలో సక్సెస్ అయ్యాడు.
సినిమాటోగ్రఫీ సూపర్బ్ గా ఉంది. ప్రతీ ఫ్రేమ్ కూడా అవుట్ స్టాండింగ్ గా ఉంది అంటే అతిశయోక్తి కాదు. లియోన్ జేమ్స్ కంపోజ్ చేసిన సాంగ్స్, బ్యాక్ గ్రౌండ్ మ్యూజిక్ కూడా సినిమాకు తగ్గట్లుగా ఉన్నాయి. ఎడిటింగ్ కూడా డీసెంట్ గా ఉంది. ఇక నిర్మాణ విలువలకు ఢోకా లేదు.
ప్లస్ పాయింట్స్:
- సినిమాటోగ్రఫీ
- బ్యాక్ గ్రౌండ్ మ్యూజిక్
- నటీనటుల పెర్ఫార్మన్స్
మైనస్ పాయింట్స్:
- మీరా, అజయ్ లవ్ ట్రాక్
- సెకండ్ హాఫ్ లో డ్రామా
చివరిగా:
ఓరి దేవుడా మొత్తానికి పర్వాలేదనిపించే రొమాంటిక్ డ్రామా. సినిమా మెజారిటీ భాగం సాఫీగా ఎటువంటి ఇష్యూ లేకుండా సాగిపోతుంది. అయితే చిత్రం అక్కడక్కడా ట్రాక్ తప్పుతున్న ఫీలింగ్ ఇస్తుంది. ఇక ఎమోషనల్ డెప్త్ లేకపోవడం కూడా మైనస్ అనే చెప్పాలి.
తెలుగు బులెటిన్ రేటింగ్: 2.5/5