తమిళనాడులో మళ్లీ మండలి ఏర్పాటు?

తమిళనాడు లో మళ్లీ శాసనమండలి ఏర్పాటు చేయడానికి పావులు కదులుతున్నాయి. తాము అధికారంలోకి వస్తే తిరిగి శాసనమండలిని పునరుద్దరిస్తామని మిత్రపక్షాలకు డీఎంకే హామీ ఇచ్చినట్టు సమాచారం. ఈ విషయాన్ని డీపీఐ నేత తిరుమావళవన్ ఓ టీవీ చానల్ ఇంటర్వ్యూలో వెల్లడించారు. త్వరలో జరగబోయే అసెంబ్లీ ఎన్నికల్లో డీఎంకే 180 సీట్లలో పోటీ చేయాలని నిర్ణయం తీసుకుంది. దీంతో మిత్రపక్షాలకు తగిన సీట్లు కేటాయించలేకపోయింది. ఈ క్రమంలో తక్కువ సీట్లతో అసంతృప్తి వ్యక్తంచేస్తున్న పార్టీలను బుజ్జగించడానికి డీఎంకే అధినేత స్టాలిన్.. మండలి పునరుద్ధరణ అంశాన్ని మళ్లీ తెరపైకి తీసుకొచ్చినట్టు తెలుస్తోంది.

ఇదే విషయాన్ని ఎన్నికల మేనిఫెస్టోలో కూడా పొందుపరిచే అవకాశం ఉంది. మండలి పునరుద్ధరణ తర్వాత మిత్రపక్షాలకే భారీగా ఎమ్మెల్సీ స్థానాలు కట్టబెడతానని హామీ ఇచ్చినట్టు చెబుతున్నారు. మాజీ సీఎం ఎంజీఆర్ హయాంలో శాసనమండలి రద్దు చేశారు. అప్పటి నుంచి డీఎంకే అధికారంలోకి వచ్చినప్పుడల్లా మండలి పునరుద్ధరణకు తీర్మానం చేసి కేంద్రానికి పంపించేది. అనంతరం అన్నాడీఎంకే అధికారంలోకి వచ్చి, ఆ ప్రతిపాదనలను రద్దు చేసేది. ఇలా మండలి పునరుద్ధరణ నిలిచిపోయింది. తాజాగా డీఎంకే దాని పునరుద్ధరణకు చొరవ తీసుకుంటోంది.