మళ్ళీ పవన్ ఎఫెక్ట్ కనిపించిందిగా..

పవన్… జగన్ ఇద్దరూ రాష్ట్రంలో బలమైన నేతలు. అందులో సందేహం అవసరం లేదు. మొదటి నుంచి జగన్ రాజకీయాల్లో ఉండటం వలన ప్రజలను ఎలా తన దారిలోకి తెచ్చుకోవాలో తెలుసుకొని ఆ విధంగా ఎన్నికల్లో ఓట్లు సంపాదించుకున్నారు. ఏ విషయాలను తెలుగుదేశం పార్టీ నిర్లక్ష్యం చేసిందో దానిమీదనే జగన్ ఎక్కువ దృష్టిపెట్టడం నుంచి హామీలు ఇవ్వడం వరకు చేయడంతో మరో ప్రత్యామ్నాయం లేక ప్రజలు వైకాపాకు ఓటు వేయడం జరిగింది.

అయితే, 2019 ఎన్నికల్లో జనసేన పార్టీ కూడా పోటీ చేసింది. పోటీలో నిలిచినప్పటికీ జనసేన పార్టీ అనుకున్న ఫలితాలు రాబట్టడంలో విఫలం అయ్యిందని చెప్పాలి. దీనికి అనేక కారణాలు ఉన్నాయి. ఒకటి అంతకు ముందు తెలుగుదేశం పార్టీతో పొత్తుపెట్టుకోవడం ఒకటైతే, ఎన్నికల్లో ప్రజలను ప్రలోభపెట్టలేకపోయారు. గత ఎన్నికల్లో ఏపీలో డబ్బు హవా విపరీతంగా నడిచింది.

జనసేన గెలవలేకపోయినప్పటికీ కూడా ఇప్పటికి తన ప్రభావాన్ని చూపుతూనే ప్రజాక్షేత్రంలో ప్రజా సమస్యలపై స్పందిస్తూ… వాటిపై జనసేన పార్టీ పోరాటం చేస్తున్నది. దానిని నవంబర్ 3 వ తేదీన విశాఖలో జరిగిన లాంగ్ మార్చ్ ఒకటైతే రెండోది ఫిబ్రవరి 12 వ తేదీన కర్నూలులో జరిగిన రోడ్ షో మరొకటి. లాంగ్ మార్చ్ తరువాత వైకాపాలో చలనం రావడం, ఇసుక కొరతను నివారించడం జరిగిపోయాయి. ఇప్పుడు కర్నూలు సుగాలి ప్రీతి రేప్ కేసు విషయంలో కూడా అలానే జరిగింది.

మొదట సుగాలి ప్రీతి తల్లిదండ్రులు వైకాపా నేతలకు కలిస్తే చీప్ గా మాట్లాడారని వాపోయారు. అక్కడి నుంచి సుగాలీ ప్రీతి తల్లిదండ్రులు జనసేన అధ్యక్షుడు పవన్ కళ్యాణ్ ను కలవడంతో, పవన్ హామీ ఇచ్చారు. ఇచ్చినట్టుగా కర్నూలులో సుగాలి ప్రీతికి న్యాయం జరగాలి అనిచెప్పి రోడ్ షో చేశారు. ఆ తరువాత ప్రభుత్వంలో చలనం వచ్చింది.

ముఖ్యమంత్రి స్వయంగా సుగాలి ప్రీతి తల్లిదండ్రులను కలిసి హామీ ఇచ్చారు. ముఖ్యమంత్రి హామీ ఇవ్వడంతో ఈ సమస్య త్వరగా ఓ కొలిక్కి వస్తుందని అనుకోవచ్చు. రాష్ట్రంలో సమస్య ఉన్న చోట ఆ సమస్యపై పవన్ స్పందిస్తే చాలు… వెంటనే ప్రభుత్వం దిగి వచ్చి దానిని వీలైనంత త్వరగా పరిష్కరిస్తోందని అర్ధం చేసుకోవచ్చు. దట్ ఈజ్ పవన్.