‘కరకట్ట బురద రాజకీయం’ మళ్ళీ మొదలైంది.?

‘చంద్రబాబు ఇంటిని ముంచేందుకే, ప్రకాశం బ్యారేజీ గేట్లను ముందుగా తెరవలేదు.. ప్రాజెక్టుల్లో నీటి నిల్వల నిర్వహణనను అస్తవ్యస్తంగా మార్చారు.. చివరికి చంద్రబాబు ఇంటిని ముంచలేకపోయారు.. పైశాచిక ఆనందం పొందారు అధికార పార్టీ నేతలు, ప్రభుత్వ పెద్దలు..’ అంటూ గత ఏడాది కృష్ణా నది వరదల సమయంలో టీడీపీ చేసిన ఆరోపణల్ని ఎలా మర్చిపోగలం.?

వైసీపీ తక్కువేం తిన్లేదు.. చంద్రబాబు ఇల్లు మునిగిపోతోందంటూ బీభత్సమైన బురద రాజకీయం చేసేసింది. కరకట్ట ప్రాంతంలో వున్న చంద్రబాబు ఇంటిని (చంద్రబాబు అద్దెకు వుంటోన్న ఇల్లు) కూల్చేందుకు వైసీపీ ప్రభుత్వం చేసిన ప్రయత్నాలు అన్నీ ఇన్నీ కావు. అది అక్రమ కట్టడం.. అంటూ నోటీసులు కూడా పంపారు అధికారులు. కానీ, ఏం జరిగింది.? ఏడాది కాలంలో.. అధికార వైసీపీ, ఆ ‘అక్రమాల్ని’ బయటపెట్టలేదు.. ఆ గెస్ట్‌ హౌస్‌ కూల్చివేత జరగలేదు. కానీ, ప్రజలకు ఉపయోగపడే అధికారిక నిర్మాణం.. ప్రజా వేదికను మాత్రం కూల్చి పారేసింది వైఎస్‌ జగన్‌ ప్రభుత్వం.

ఇప్పుడు మళ్ళీ కృష్ణా నదికి వరదొచ్చింది. చంద్రబాబు నివాసం వుంటోన్న ఇల్లు సహా, కరకట్టను ఆనుకుని వున్న అనేక నిర్మాణాలకు మళ్ళీ నోటీసులు వెళ్ళాయి. ఈసారి ఇదివరకటిలా కూల్చేస్తామని మాత్రం కాదండోయ్‌.. వరద వచ్చే అవకాశం వుంది గనుక, ఖాళీ చేయాలని మాత్రమే. ఈ ఏడాదిలో రాజకీయం ఏం అంతగా మారిపోయిందని ఈ ‘వెసులుబాటు’, ‘అతి ప్రేమ’ ప్రభుత్వ పెద్దలు ప్రదర్శిస్తున్నట్లు.? ఇదిప్పుడు రాష్ట్ర ప్రజానీకానికి తెలియాల్సిన విషయం.

చంద్రబాబు నివాసం అక్రమమైనదా.? సక్రమమైనదా.? అక్రమమైనదే అయితే, ప్రజా వేదికను కూల్చేసినట్లు, చంద్రబాబు ఇంటిని ఎందుకు కూల్చేయలేదు.? చంద్రబాబు మీద వైఎస్‌ జగన్‌కి అంతలా ‘అమితమైన ప్రేమ’ ఎందుకు పుట్టుకొచ్చినట్లు.? ఇది చంద్రబాబు మీద ప్రేమా.? లేదంటే, గెస్ట్‌ హౌస్‌ ఓనర్‌ లింగమనేని మీద కొత్తగా పుట్టుకొచ్చిన ప్రేమా.? ఇవేవీ కాదు, అది అక్రమ కట్టడం కానే కాదని ప్రభుత్వం చెప్పదలచుకుంటే, గతంలో ఎందుకు దాన్ని అక్రమ కట్టడంగా తేల్చారు.? ఆ పేరు చెప్పి ప్రజా వేదికను ఎందుకు కూల్చారు.? ప్రజా ధనాన్ని ఎందుకు నాశనం చేశారు.? అన్న ప్రశ్నలకు ప్రభుత్వ పెద్దలు సమాధానం చెప్పి తీరాల్సిందే.