బాలయ్య బ్లడ్డు, బ్రీడు వేరు.. ఆయనే రాసుకుపూసుకు తిరగాలె.!

తాను చేస్తేనే సంసారం.. ఇంకెవడన్నా చేస్తే అది వ్యభిచారం అన్నాడట వెనకటికి ఒకడు. ఇప్పుడు ఈ ప్రస్తావనని టీడీపీ ఎమ్మెల్యే, సినీ నటుడు నందమూరి బాలకృష్ణ విషయంలో తెస్తున్నారు చాలామంది. తెలంగాణ ప్రభుత్వ పెద్దలతో రాసుకు పూసుకు తిరుగుతున్నారు కదా.. మూవీ ఆర్టిస్ట్స్ అసోసియేషన్ కోసం ఎకరం భూమిని ప్రభుత్వం నుంచి సంపాదించలేకపోయారా.? అంటూ ఎద్దేవా చేసేశారు.

మూవీ ఆర్టిస్ట్స్ అసోసియేషన్ తరఫున నిధుల వేట కోసం విదేశాలకు ‘క్లాస్’ టిక్కట్లలో వెళ్లొచ్చారు కదా.? ఆ నిధులు ఏమయ్యాయ్.? అని కూడా బాలయ్య నిలదీసేశారు. నిజానికి, బాలయ్య లేస్తే మనిషి కారు.. లేవరంతే. మెగా క్యాంప్ మీద పరోక్షంగానో, ప్రత్యక్షంగానో బాలయ్య విమర్శలు చేయడం కొత్త విషయం కాదు.

‘బాలయ్య చిన్న పిల్లాడు.. ఆయన మాటల్ని పట్టించుకోవద్దు..’ అని చిరంజీవి ఓ సందర్భంలో లైట్ తీసుకున్నారు. ఓ సారి చిరంజీవి తనకు సినీ పరిశ్రమలో అత్యంత సన్నిహితుడైన మిత్రుడని బాలయ్యే అంటాడు.. అదే బాలయ్య, ‘మా బ్లడ్డు వేరు.. మా బ్రీడు వేరు..’ అంటారు. అందుకేనేమో, చిరంజీవి.. బాలయ్యను లైట్ తీసుకుంటారు.

ఇక, ‘మా’ వివాదం విషయానికొస్తే, మంచు విష్ణుకి బాలయ్య మద్దతు తెలిపిన విషయం విదితమే. అదే సమయంలో, లోకల్ నాన్ లోకల్ వివాదంలో ప్రకాష్ రాజ్‌కి బాలయ్య మద్దతు పలికినట్లయ్యింది. వెయ్యి మంది సభ్యులు కూడా లేని అసోసియేషన్ వ్యవహారంలో ఇంత రాజకీయం అవసరమా.? అన్నది మిలియన్ డాలర్ల ప్రశ్న.

మరోపక్క, కోటానుకోట్లు సంపాదించే సినీ ప్రముఖులు మూవీ ఆర్టిస్ట్స్ అసోసియేషన్ కోసం ఓ భవనాన్ని ఎందుకు నిర్మించలేకపోయారన్నది ఇంకో ప్రశ్న. చిరంజీవి, నాగార్జున మాత్రమే కాదు, బాలయ్య కూడా తెలంగాణ ముఖ్యమంత్రి కేసీయార్‌తో రాసుకుపూసుకు తిరిగారు. మరి, ఆయనైనా ఓ ఎకరం భూమిని అసోసియేషన్ కోసం తెలంగాణ ప్రభుత్వం నుంచి రప్పించలేకపోయారంటే, దానర్థమేంటి.?

పైగా, 2014 నుంచి 2019 వరకు ఆంధ్రపదేశ్ రాష్ట్రంలో టీడీపీనే అధికారంలో వుంది. అప్పుడూ ఆయన ఎమ్మెల్యేనే. ఆ కోణంలో అయినా, తెలంగాణ ప్రభుత్వాన్ని ఆయన రిక్వెస్ట్ చేసి వుండాల్సింది. అందరూ మాటలే చెబుతారు.. పనిదగ్గరకు వచ్చేసరికి, ‘ఇది చాలా చిన్న విషయం. మాది చాలా పెద్ద రేంజ్..’ అంటుంటారు. అసోసియేషన్ భవనం కోసం డబ్బులిచ్చేస్తామని ఇప్పుడు చాలామంది చెబుతున్నారు.. ఇప్పటిదాకా ఎందుకు ఇవ్వలేకపోయారో ఏమో.!