ఒడిశా: అనుభవం.. అప్రమత్తతతోనే కరోనా కట్టడి

అనుభవం ఎవరినైనా రాటుదేలుస్తుంది. అప్రమత్తత ఏదైనా ముప్పు నుంచి కాపాడుతుంది. సరిగ్గా ఈ రెండు విషయాలే ఒడిశాలో కరోనా కట్టడికి ఉపకరించాయి. వరదలు, తుఫాన్లు, కరువు వంటి ఎన్నో విపత్కర పరిస్థితులు ఆ రాష్ట్రం ఎదుర్కొంది. దీంతో ప్రకృతి విపత్తులను ఎదుర్కొనే సమర్థత వారి సొంతమైంది. ఇది కరోనా సెకండ్ వేవ్ తమ రాష్ట్రంలో విజృంభించకుడా చూసుకోవడంలో సఫలీకృతమైంది. తమ దగ్గర కేసులు ఎక్కువ నమోదు కాకుండా చూసుకోవడమే కాకుండా దేశవ్యాప్తంగా ఏర్పడిన ఆక్సిజన్ కొరతను చాలావరకు తీరుస్తోంది. వాస్తవానికి దేశంలో కరోనా మొదటి దశలోనూ ఒడిశానే ముందుగా స్పందించింది. బయట రాష్ట్రాల నుంచి వచ్చేవారిని పరీక్షలు చేసిన తర్వాతే రాష్ట్రంలోకి అనుమతించింది.

అలాగే 8 లక్షల పడకలతో క్వారంటైన్ కేంద్రాలు ఏర్పాటు చేసింది. కరోనా నిబంధనలను ఉల్లంఘించినవారిపై కఠిన చర్యలు తీసుకుంది. తద్వారా మొదటి దశను సమర్థంగా ఎదుర్కొంది. ఇక కరోనా సెకండ్ వేవ్ ను కూడా ముందే పసిగట్టింది. ఏప్రిల్ ఒకటో తేదీ నుంచే ఛత్తీస్ గఢ్ నుంచి వచ్చే మార్గాలను మూసివేసింది. ఆర్టీపీసీఆర్ పరీక్ష రిపోర్టు ఉన్నవారినే రాష్ట్రంలోకి అనుమతించింది. అవి లేనివారిని సరిహద్దుల్లోని క్వారంటైన్ కేంద్రాల్లో ఉంచింది. అంతేకాకుండా కేవలం కోవిడ్ చికిత్స అందించడానికి 50 ఆస్పత్రులను సిద్దం చేసింది. అంతేకాకుండా మే 5వ తేదీ నుంచి 14 రోజుల లాక్ డౌన్ కూడా విధించింది. ఇలా కరోనా నియంత్రణకు కఠిన చర్యలు తీసుకుంటుండంతో ఇతర రాష్ట్రాల కంటే అక్కడ కేసులు తక్కువగానే నమోదవుతున్నాయి.