వైఎస్సార్ స్థాయి పెరుగుద్దా.? ఎన్టీయార్ స్థాయి తగ్గుద్దా.?

అసలు పేరులో ఏముంది.? ప్రజల సొమ్ముతో కుటుంబ సభ్యుల పేర్లను సంక్షేమ పథకాలకో, యూనివర్సిటీలకో పెట్టడమేంటి.? నవ్విపోదురుగాక వాళ్ళకేటి సిగ్గు.?

ఎవరు ఔనన్నా ఎవరు కాదన్నా ఇదే వాస్తవం.! స్వర్గీయ ఎన్టీయార్ గొప్ప నటుడే కావొచ్చు, గొప్ప రాజకీయ నాయకుడు కావొచ్చు. అలాగని, ఆయన పేర్లను అన్నిటికీ పెట్టేస్తామంటే ఎలా.? హెరిటేజ్ సంస్థకు ఎన్టీయార్ పేరెందుకు పెట్టలేదు.!

వైఎస్ రాజశేఖర్ రెడ్డి విషయంలో కూడా ఇదే వర్తిస్తుంది. సాక్షి అని జగన్ మీడియా సంస్థలకు ఎందుకు పేరు పెట్టినట్లు.? వైఎస్సార్ అని పెట్టుకోవచ్చు కదా.? భారతి సిమెంట్స్ పేరు మార్చుకోవచ్చు కదా.? పెట్టరుగాక పెట్టరు. అప్పనంగా వచ్చింది కాబట్టి, ప్రజా ఆస్తులకు సంబంధించి కావొచ్చు, ప్రజా సంక్షేమానికి సంబందించి కావొచ్చు.. తమ కుటుంబ సభ్యుల పేర్లను అధికారంలో వున్నోళ్ళు పెట్టుకోవడం ఆనవాయితీగా మారిపోయింది.

ఎవడబ్బ సొమ్మనీ.. అంటూ జనం నిలదీస్తున్నారు సోషల్ మీడియా వేదికగా.! అన్నట్టు, యంగ్ టైగర్ ఎన్టీయార్ తన తాత స్వర్గీయ ఎన్టీయార్ పేరు మీద నడుస్తోన్న హెల్త్ వర్సిటీ పేరు మార్పుపై అభ్యంతరం వ్యక్తం చేస్తూ ట్వీటేశారు. పేరు మార్చడం వల్ల ఎన్టీయార్ స్థాయి తగ్గదన్నారు. ఎన్టీయార్ పేరు తీసేసి వైఎస్సార్ పేరు పెట్టడం వల్ల వైఎస్సార్ స్థాయి పెరగదనీ యంగ్ టైగర్ చెప్పుకొచ్చాడు.

నిజమే, మహాత్మగాందీ పేరు పెట్టుకుంటే ఆయన స్థాయి పెంచినవాళ్ళమవుతామా.? పెంచకపోతే ఆయన స్థాయి తగ్గించినవాళ్ళమవుతామా.? రోడ్ల మీద విగ్రహాలు పెడతాం.. ఎండకు ఎండుతాయ్.. వానకు తడుస్తాయ్.. దుమ్ముకొట్టుకుపోతాయ్. నాయకుల్ని అవమానిస్తున్నామా.? అభిమానిస్తున్నామా.?

నవ్విపోదురుగాక వాళ్ళకేటి సిగ్గు.? ఔను, పేర్లు పెట్టేవాళ్ళకి కాస్తంత ఇంగితం కూడా వుండదు. జనం సొమ్ముతో తమ, తమ కుటుంబ సభ్యుల పబ్లిసిటీ ఏంటన్న కనీసపాటి సోయ వుండాలి కదా రాజకీయ నాయకులకి.? అని జనంలో ఆగ్రహావేశాలు పెల్లుబికుతున్నాయి.