కరోనా అలర్ట్‌: తెలుగు రాష్ట్రాలు చాలా చాలా బెటరేగానీ.??

తెలుగు రాష్ట్రాల్లో కరోనా పాజిటివ్‌ కేసుల సంఖ్య నిలకడగా కొనసాగుతోంది. ప్రతిరోజూ 50 కేసులకు అటూ ఇటూగా తెలుగు రాష్ట్రాల్లో నమోదవుతున్నాయి. పొరుగున వున్న తమిళనాడు, కర్నాటక రాష్ట్రాలే కాదు, ఒరిస్సాలోనూ కేసుల తీవ్రత క్రమక్రమంగా పెరుగుతూ వస్తోంది. మహారాష్ట్ర సంగతి సరే సరి. తెలంగాణ విషయానికొస్తే, గ్రేటర్‌ హైద్రాబాద్‌ మినహా తెలంగాణలోని ఇతర జిల్లాల్లో కరోనా దాదాపుగా అదుపులోకి వచ్చేసింది. రంగారెడ్డి జిల్లాలో మాత్రం ఒకటీ అరా కేసులు నమోదవుతున్నాయి. జీహెచ్‌ఎంసీ పరిధిలో కేసులు కొంత ఆందోళనకరంగానే వున్నా, దేశంలోని ప్రధాన నగరాలతో పోల్చితే హైద్రాబాద్‌ చాలా బెటర్‌.

ఇక, ఆంధ్రప్రదేశ్‌లో కరోనా పాజిటివ్‌ కేసుల సంఖ్య నిలకడగానే వుంటోంది చాలా కాలంగా. తెలుగు రాష్ట్రాల్లో ప్రజా రవాణా పునఃప్రారంభమయన దరిమిలా.. రానున్న రోజుల్లో కరోనా వైరస్‌ పాజిటివ్‌ కేసుల సంఖ్య ముందు ముందు ఎలా వుండబోతోందన్న చర్చ సర్వత్రా జరుగుతోంది. అయితే, ప్రభుత్వాలు తీసుకుంటున్న చర్యలు సత్పÛలితాలిస్తున్నాయనీ, తెలుగు రాష్ట్రాల్లో పరిస్థితి దేశంలోని చాలా ఇతర రాష్ట్రాలతో పోల్చితే కాస్త మెరుగ్గానే వుందని కేంద్రం కూడా చెబుతుండడం గమనార్హం. అయితే, తెలంగాణలో టెస్ట్‌ల సంఖ్య తక్కువగా వుండడం రాజకీయ దుమారానికి కారణమవుతోంది. అదే సమయంలో, ఆంధ్రప్రదేశ్‌లోనూ కేసుల సంఖ్య విషయమై గందరగోళం నెలకొందన్న రాజకీయ విమర్శల్ని చూస్తున్నాం. రాజకీయ రగడ సంగతి పక్కన పెడితే.. రానున్న రోజుల్లో కరోనా, తెలుగు రాష్ట్రాల్లో తగ్గుముఖం పట్టి, పూర్తిగా అదుపులోకి వచ్చేలానే కన్పిస్తోంది. ఇదిలా వుంటే, దేశంలోని ప్రధాన నగరాల మధ్య విమానయానం షురూ కానున్న దరిమిలా.. కరోనా వైరస్‌ కేసులు పెరిగే అవకాశముందనీ, తెలుగు రాష్ట్రాల్లోనూ పెరుగుదల వుండొచ్చన్న వాదనలు తెరపైకొస్తున్నాయి.

ఎలాంటి పరిస్థితిని అయినా ఎదుర్కోవడానికి సిద్ధంగా వున్నామంటూ ప్రభుత్వాలు చేస్తున్న ప్రకటనలు కొంత భరోసా ఇచ్చేలానే వున్నా, కరోనా వైరస్‌ తెలుగు రాష్ట్రాల్లో ఇప్పటికే సృష్టించిన భయాందోళనల నేపథ్యంలో.. ప్రజలు మాత్రం ముందు ముందు ఇంకెలాంటి ఉపద్రవం చూడాల్సి వస్తుందోనన్న ఆందోళనని వ్యక్తం చేస్తున్నారు. ఇక, దేశంలో కరోనా పాజిటివ్‌ కేసుల విషయానికొస్తే, నాలుగైదు రోజుల్లోనే మొత్తం కేసుల సంఖ్య లక్షన్నర దాటే అవకాశం వుంది. గత రెండు మూడు రోజులుగా సగటున రోజుకి 6 వేల పైన కేసులు నమోదవుతున్నాయి.