నిమ్మగడ్డ లేఖ రగడ: రాసింది ఆయనేనా?

ఏపీ మాజీ ఎన్నికల కమిషనర్ నిమ్మగడ్డ రమేశ్ కుమార్ లేఖ వ్యవహారం మరోసారి తెరపైకి వచ్చింది. ఈ లేఖ వెలుగులోకి వచ్చి దాదాపు నెలరోజులు అవుతున్నా.. అది రాసింది ఎవరనే విషయంపై ఇప్పటికీ క్లారిటీ లేదు. తాజాగా ఈ లేఖ రాసింది తానేనని.. ఇందులో ఇతరులకు ఆందోళన అనవసరమంటూ రమేశ్ కుమార్ ఖండించినట్టుగా వార్తలొచ్చాయి.

అయితే, ఆయన నేరుగా మీడియా ముందుకొచ్చి వివరణ ఇవ్వకపోవడంతో ఇందులో నిజమెంత అనేదానిపై అనుమానాలు వ్యక్తమవుతున్నాయి. ఏపీలో స్థానిక సంస్థల ఎన్నికలను వాయిదా వేస్తూ రమేశ్ కుమార్ తీసుకున్న నిర్ణయాన్ని సీఎం జగన్ తప్పుబట్టిన సంగతి తెలిసిందే. ఈ నిర్ణయం తీసుకున్న రమేశ్ పై ఆయన తీవ్రంగా విరుచుకుపడ్డారు. కులం ఆపాదించి విమర్శలు చేశారు.

టీడీపీ అధినేత చంద్రబాబుకు అనుకూలంగా వ్యవహరిస్తున్నారని ఆరోపణలు చేశారు. అనంతరం సుప్రీంకోర్టుకు వెళ్లగా.. ఎన్నికల వాయిదాను సమర్థించింది. అయితే, ఎన్నికల కోడ్ ఎత్తివేయాలని సూచించింది. ఈ నేపథ్యంలో గతనెల 18న తనకు భద్రత కల్పించాలంటూ రమేశ్ కుమార్ కేంద్ర హోంశాఖకు 5 పేజీల లేఖ రాసినట్టుగా మీడియాలో వార్తలొచ్చాయి. అయితే, ఆ లేఖ రాసింది ఆయనేనా.. కాదా అనే అంశంపై అప్పట్లోనే భిన్నాభిప్రాయాలు వ్యక్తమయ్యాయి.

ఈ లేఖ రాసింది మీరేనా అని రమేశ్ ను అడిగినా.. ఆయన ధ్రువీకరించలేదు. ప్రముఖ వార్తాసంస్థ ఏఎన్ఐ తో మాత్రం తాను ఆ లేఖ రాయలేదని వెల్లడించడం గమనార్హం. పైగా రమేశ్ కుమార్ సంతకానికి.. లేఖలో ఉన్న సంతకానికి భారీ తేడా ఉంది. రెండు లేఖలను పోల్చి చూస్తే ఆ తేడా చాలా స్పష్టంగా కనిపిస్తోంది. మరోవైపు కేంద్ర హోంశాఖ మాత్రం తమకు ఎస్ఈసీ నుంచి లేఖ అందిందని ధ్రువీకరించింది. అయితే, ఈ లేఖపై ఇంత రగడ జరుగుతున్నప్పటికీ, రమేశ్ కుమార్ మాత్రం మీడియా ముందుకు వచ్చి ఎలాంటి వివరణా ఇవ్వలేదు.

ఈ పరిస్థితుల్లో వైఎస్సార్ సీపీ ఎంపీ విజయసాయిరెడ్డి.. ఈ లేఖపై దర్యాప్తు జరిపించాలని డీజీపీకి ఫిర్యాదు చేశారు. లేఖలోని సంతకంలో తేడా ఉందని, ఇది టీడీపీ కార్యాలయంలో తయారైనట్టుగా ఉందని పేర్కొన్నారు. ఈ నేపథ్యంలో రమేశ్ నుంచి వివరణ వచ్చినట్టుగా వార్తలొచ్చాయి. వాస్తవానికి ఆయన నేరుగా మీడియాకు ఈ విషయం చెప్పకపోవడంతో అధికార పార్టీ నేతలు అనుమానాలు వ్యక్తంచేస్తున్నారు. పైగా లేఖ వ్యవహారం నెలరోజులుగా సాగుతున్నా.. రమేశ్ కుమార్ ఒక్కసారి కూడా ఖండించని విషయాన్ని గుర్తు చేస్తున్నారు.

ఇప్పుడు డీజీపీకి ఫిర్యాదు చేయగానే ఈ ప్రకటన రావడంపై అనుమానాలు వ్యక్తంచేస్తున్నారు. ఒకవేళ నిజంగా రమేశ్ కుమారే ఈ లేఖ రాసి ఉంటే.. నేరుగా మీడియా ముందుకు వచ్చి చెబితే సరిపోతుంది కదా అని పేర్కొంటున్నారు.