నిఖిల్ సిద్దార్ధ్.. ఎందుకు కెలుక్కున్నాడు చెప్మా.?

ప్రధాని నరేంద్ర మోడీని వెనకేసుకొస్తూ, జార్ఖండ్ ముఖ్యమంత్రి హేమంత్ సోరెన్ మీద ట్విట్టర్ వేదికగా సెటైర్లు వేశారు ఆంధ్రపదేశ్ ముఖ్యమంత్రి వైఎస్ జగన్ మోహన్ రెడ్డి. అసలు ఆ అవసరం వైఎస్ జగన్ మోహన్ రెడ్డికి ఎందుకు వచ్చింది.? అంటే, నిన్నటి శుక్రవారం.. ఆయనగారి బెయిల్ రద్దు కోరుతూ వైసీపీ రెబల్ ఎంపీ రఘురామకృష్ణరాజు వేసిన పిటిషన్ విచారణకు రావడం వల్లేనంటున్నారు తెలుగు తమ్ముళ్ళు. అదెంత నిజం.? అన్నది వేరే చర్చ. బెయిల్ రద్దు పిటిషన్..పై విచారణ వాయిదా పడిందనుకోండి.. అది వేరే సంగతి.

జార్ఖండ్ ముఖ్యమంత్రి – ప్రధాన మంత్రి మధ్య సంభాషణ కావొచ్చు, రాజకీయ విభేదాలు, ఆ రాష్ట్ర అవసరాలు కావొచ్చు.. అది వారిద్దరికీ సంబంధించిన అంశం. వైఎస్ జగన్ ఎందుకు జోక్యం చేసుకున్నరన్నదానికి బులుగు కార్యకర్తల వద్దనే సరైన సమాధానం లేదు. ఇక, ఈ వ్యవహారంలోకి సినీ నటుడు నిఖిల్ సిద్దార్ధ్ ఎంట్రీ ఇచ్చాడు. వైఎస్ జగన్ మోహన్ రెడ్డిని వెనకేసుకొస్తూ ట్వీటేశాడు. ఈ పాండమిక్ సమయంలో రాజకీయాలు మంచిది కాదన్న జగన్ ఆలోచనతో తాను ఏకీభవిస్తున్నట్లు సెలవిచ్చాడు నిఖిల్. అసలు ఈ వ్యవహారంలో నిఖిల్ ఎందుకు తలదూర్చినట్లు.? నిఖిల్, పవన్ కళ్యాణ్ వీరాభిమాని. కానీ, వివిధ పార్టీలతో ఆయనకు సన్నిహిత సంబంధాలున్నాయి. ప్రతిసారీ ఇలాగే ఆయా పార్టీల నుంచి చీవాట్లు తినాల్సి వస్తోంది పాపం.

ఈసారీ విపరీతమైన ట్రోలింగ్ ఎదుర్కొంటున్నాడు. ఆ సంగతి పక్కన పెడితే, కరోనా నేపథ్యంలో బాధితుల్ని ఆదుకునేందుకు మొదటి వేవ్ సమయంలోనూ తనవంతు కష్టపడ్డాడు.. ఇప్పుడూ ఆదుకుంటున్నాడు. తన సేవ ఏదో తాను చేసుకోక, ఈ కెలుక్కోవడమెందుకట.? వచ్చిన మంచి పేరుని వెంటనే చెడగొట్టేసుకోవాలన్న తాపత్రయమేమో. ఓ నెటిజన్, నిఖిల్ మీద విమర్శలు చేస్తూ ట్వీటెయ్యడంతో, అవిప్పుడు వదిలేద్దాం బ్రదర్.. అంటూ నిఖిల్ ముక్తాయింపు ఇవ్వాల్సి వచ్చింది. సదరు నెటిజన్ పెట్రో ధరల నుంచి చాలా అంశాల్ని ప్రస్తావించాడు.