పోతిరెడ్డిపాడుపై ఏపీ సర్కారుకి ఎదురుదెబ్బ

పోతిరరెడ్డిపాడు సామర్థ్యం పెంపు విషయంలో ఆంధ్రప్రదేశ్ దూకుడికి నేషనల్ గ్రీన్ ట్రిబ్యునల్ (ఎన్జీటీ) బ్రేక్ వేసింది. ఈ ప్రాజెక్టు కారణంగా పర్యావరణంపై పడే ప్రభావం గురించి అధ్యయనం చేసి ఇచ్చేందుకు నాలుగు శాఖలతో ఓ కమిటీని ఏర్పాటు చేసింది. నివేదిక ఇచ్చేందుకు రెండు నెలల గడువు ఇచ్చింది. అప్పటివరకు ప్రాజెక్టు పనులు ప్రారంభించడానికి వీల్లేదని పేర్కొంటూ స్టే విధించింది.

ఇప్పటికే ఈ ప్రాజెక్టుపై తెలంగాణ అభ్యంతరం వ్యక్తం చేసిన సంగతి తెలిసిందే. దీనిపై కృష్ణా రివర్ బోర్డుకు ఫిర్యాదు కూడా చేసింది. దీంతో ఏపీ బోర్డు ముందు తన వాదనలు వినిపించింది. ఈ సందర్భంగా తెలంగాణ ప్రాజెక్టులపై ఫిర్యాదు చేయడంతో బోర్డు.. వాటిపై తెలంగాణ సర్కారు నుంచి వివరణ కోరింది. ఈ నేపథ్యంలో ఎన్జీటీ అనూహ్యంగా తెరపైకి వచ్చింది. ఈ ప్రాజెక్టుపై నారాయణపేటకు చెందిన శ్రీనివాస్ అనే వ్యక్తి ట్రిబ్యునల్ లో ఫిర్యాదు చేశారు. దీనిపై బుధవారం విచారణ జరిపిన ట్రిబ్యునల్.. కృష్ణా బోర్డు, కేంద్ర పర్యావరణ శాఖ, కాలుష్య నియంత్రణ మండలి, ఐఐటీ హైదరాబాద్ కు చెందిన వ్యక్తులతో కమిటీ నియమించింది. ఈ కమిటీ నివేదిక ఇచ్చేవరకు ప్రాజెక్టు పనులు ప్రారంభించడానికి అవకాశం లేకుండా పోయింది.

నేడో, రేపో పోతిరెడ్డిపాడుపై టెండర్లు పిలవాలని యోచిస్తున్న జగన్ సర్కారుకు ఇది ఎదురుదెబ్బగా పరిణమించింది. రూ.7వేల కోట్ల వ్యయంతో చేపట్టనున్న ఈ ప్రాజెక్టు విషయంలో ముందుకెళ్లకుండా చూడాలని కేంద్ర జలవనరుల శాఖ మంత్రి కృష్ణా బోర్డును ఆదేశించడంతో.. బోర్డు ఎలాంటి చర్యలూ చేపట్టొద్దని ఇప్పటికే ఏపీ సర్కారుకు సూచించింది. అయినప్పటికీ, ఈ ప్రాజెక్టుకు సంబంధించి టెండర్లు పిలవడానికి ఏపీ సమాయత్తమైన తరుణంలో ఎన్జీటీ బ్రేక్ వేసింది.