కరోనాని చంపే జెల్ ని కనుగొన్న బాంబే ఐఐటి.!

కరోనా మహమ్మారిని ఎదుర్కోవడానికి ప్రపంచ దేశాలన్నీ తమ వంతు ప్రయత్నాలు చేస్తున్నాయి. కొంతమంది వాక్సిన్లు తయారీలో నిమగ్నమై ఉండగా.. మరికొంత మంది దీనిని నిరోధించే ఔషధం కనుగొనే ప్రయత్నంలో తలమునకలై ఉన్నారు. వాక్సిన్ రావడానికి కనీసం 16 నెలల సమయం పడుతుందని తెలుస్తుంది. అయితే, ఇప్పుడు వాక్సిన్ కంటే దీనిని ఎదుర్కొనే డ్రగ్ కావాల్సిన అవసరమే ఎక్కువగా ఉంది.

ఇందుకు సంబంధించి ముమ్మరంగా ప్రయత్నాలు కొనసాగుతున్నాయి. ఈ తరుణంలో బాంబే ఐఐటీ ఓ వినూత్నమైన ఆవిష్కరణతో ముందుకొచ్చింది. అసలు వైరస్ మనిషి శరీరంలోకి వెళ్లకుండా నిరోధించే ఓ జెల్ ను అభివృద్ధి చేస్తోంది. దీనిని ముక్కు వద్ద రాసుకుంటే కరోనా వైరస్ కణాలను లోనికి వెళ్లకుంటే అడ్డుకునే అక్కడే చంపేస్తుంది. ఫలితంగా అది మనిషి శరీరంలోకి వెళ్లే అవకాశం ఉండదు. తద్వారా వైరస్ సోకదు. కరోనా వైరస్ ఊపిరితిత్తుల్లోకి వెళ్లకుండే చేయడమే తమ ఉద్దేశమని, ఈ జెల్ ను ముక్కు రంధ్రాల వద్ద పూసుకుంటే వైరస్ కణాలు లోనికి వెళ్లే అవకాశం ఉండదని బాంబే ఐఐటీలోని డిపార్ట్ మెంట్ ఆఫ్ బయో సైన్సెస్ అండ్ బయో ఇంజనీరింగ్ కి చెందిన పరిశోధకులు పేర్కొంటున్నారు. కరోనా వైరస్ మనిషి శరీరంలోకి ప్రవేశించే ప్రాథమిక ప్రవేశ ప్రాంతం ముక్కు కాబట్టి.. తాము ఆ దిశగా ప్రయత్నాలు చేస్తున్నట్టు చెబుతున్నారు.

ఇది తొలిదశ వ్యూహం కాగా, రెండో దశలో జీవకణాల ద్వారా మనిషి లోపల ఉన్న వైరస్ ను నిర్వీర్యం చేసే దిశగా తమ పరిశోధనలు సాగనున్నట్టు తెలిపారు. బాంబే ఐఐటీకి చెందిన ప్రొఫెసర్లు కిరణ్ కొండబాగిల్, రిత్ని బెనర్జీ, అశుతోష్ కుమార్, షామిక్ సేన్ ఈ దిశగా పరిశోధనలు సాగిస్తున్నారు. ఇప్పటికే ప్రపంచవ్యాప్తంగా 15 లక్షల పాజిటివ్ కేసులు, 88వేల మరణాలు చోటుచేసుకోవడం.. ఈ సంఖ్య క్రమంగా పెరుగుతుండటంతో వైరస్ నిరోధక ఔషధం తక్షణావసరమే. అయితే, బాంబే ఐఐటీ అభివృద్ధి చేస్తున్న ఈ జెల్ అందుబాటులోకి రావడానికి కనీసం 9 నెలల సమయం పడుతుందని చెబుతున్నారు.