పించన్లు.. జగన్ పుట్టి ముంచుతాయా?

అవ్వాతాతల పింఛన్లను రెండు వేల రూపాయల నుంచి మూడు వేల రూపాయల వరకూ పెంచుకుంటూ పోతానని ఎన్నికల సమయంలో హామీ ఇచ్చిన జగన్.. భారీ మెజార్టీతో అధికారంలోకి వచ్చారు. అటు తర్వాత తొలి సంతకం పింఛన్ల పెంపుపైనే చేశారు. కానీ ఒక్కసారిగా మూడువేలు చేయకుండా ఏడాదికి రూ.250 చొప్పున నాలుగేళ్లకు మూడు వేలు చేస్తానని ప్రకటించడం అవ్వా తాతల్లో తీవ్ర అసంతృప్తికి దారి తీసింది.

కానీ రాష్ట్ర ఆర్థిక పరిస్థితి దృష్ట్యా చేసేదేమీ లేకపోవడతో నెమ్మదిగా అలవాటైపోయారు. వారిలో నెలకొన్న ఈ అసంతృప్తిని తొలగించేందుకు వారి ఇళ్లకే వెళ్లి పింఛన్లు అందించే ఏర్పాట్లు చేయడం కొంతవరకు ఫలితాన్నిచ్చింది. తాము తిరగాల్సిన పని లేకుండా ఇంటికే పైసలు రావడంతో సానుకూలంగానే ఉన్నారు.

అయితే, ఆ తర్వాత జగన్ తీసుకున్న నిర్ణయమే ఇప్పుడు రాష్ట్రంలోని చాలామంది పింఛనుదారుల్లో అసంతృప్తికి దారితీస్తోంది. పింఛన్ల పెంపుతోపాటు పింఛను వయోపరిమితిని కూడా తగ్గించి కొత్తవారికి ఇస్తామని ప్రకటించారు. ఇక్కడే ప్రభుత్వం అతి తెలివిగా వ్యవహరించింది. పింఛన్లు పొందుతున్నవారిలో అర్హులు, అనర్హులను గుర్తించి పనికి శ్రీకారం చుట్టింది.

ఈ క్రమంలో పలువురి పింఛన్లకు భారీగా కోత పడింది. గత ప్రభుత్వ హయాంలో లేని నిబంధనలను తాజాగా తీసుకురావడంతో ఇప్పటివరకు పింఛను పొందుతున్నవారు అనర్హతకు గురయ్యారు. ఇది వారిలో తీవ్ర అసంతృప్తికి దారితీసింది. తమ నోటి దగ్గర రూపాయిని జగనే తీసేశారని ధ్వజమెత్తుతున్నారు.

ముఖ్యంగా ఆదాయపన్ను కడుతున్నవారికి పింఛన్లు ఇవ్వొద్దని సర్కారు గట్టి ఆదేశాలిచ్చింది. ఇదే చాలామందికి శాపంగా పరిణమించింది. కుటుంబంలో ఏ ఒక్కరు ఆదాయపన్ను కడుతున్నా ఆ ఇంట్లో ముసలాళ్లకు పింఛను తీసేశారు. నిజానికి వారి పిల్లలు ఎక్కడో ఉద్యోగం చేసుకుని స్థిరపడినా రేషన్ కార్డులో వారి పేరు ఊరిలోనే ఉండిపోయింది. అదే పింఛనుదారులకు సమస్యగా మారింది. దీంతో రేషన్ కార్డుల నుంచి తమ పిల్లల పేర్లు తొలగించాలని గ్రామవాలంటీర్ల చుట్టూ తిరుగుతున్న ఫలితం కనిపించడంలేదు. వెరసి ఈ వ్యవహారం జగన్ పై తీవ్ర ఆగ్రహానికి కారణమవుతోంది.