నెల్లూరు జిల్లాలో పాలనకు కొత్త దిశనిస్తూ జిల్లా కలెక్టర్ Himanshu Shukla తనదైన ముద్ర వేస్తున్నారు. బాధ్యతలు స్వీకరించి ఎనిమిది నెలలు పూర్తవుతున్న వేళ, వినూత్న కార్యక్రమాలు, సమర్థవంతమైన అమలు, ప్రజలతో ప్రత్యక్ష అనుసంధానం ద్వారా జిల్లాలో ప్రత్యేక గుర్తింపును సాధించే ప్రయత్నం చేస్తున్నారు. విద్యార్థి దశ నుంచే కలలుగా భావించే ఐఏఎస్ పదవిలోకి చేరిన తర్వాత, జిల్లా అభివృద్ధికి దోహదపడేలా అహర్నిశలు కృషి చేస్తున్నారు.
ప్రజా సమస్యల పరిష్కార వేదిక అయిన పీజీఆర్ఎస్ కార్యక్రమాన్ని బాధ్యతాయుతంగా నిర్వహిస్తూ, మొదటి సమావేశంలోనే వచ్చిన సమస్యను వేగంగా పరిష్కరించడం ద్వారా ప్రజల్లో నమ్మకం కల్పించారు. కావలి ప్రాంతానికి చెందిన ఒక మహిళ గృహ సమస్యను తక్షణమే పరిష్కరించడంతో, ఆమె స్వయంగా వచ్చి కృతజ్ఞతలు తెలపడం ఈ వ్యవస్థపై విశ్వాసాన్ని మరింత పెంచింది.
జిల్లాలో పారిశ్రామిక అభివృద్ధికి కూడా ఆయన ప్రత్యేక దృష్టి సారిస్తున్నారు. ఉపయోగం లేని భూములను పరిశ్రమల కోసం సిద్ధం చేసి, భారీ పెట్టుబడులను ఆకర్షించే దిశగా చర్యలు తీసుకుంటున్నారు. దుత్తలూరు మండలం రాచవారిపల్లి వద్ద సుమారు రూ.3000 కోట్లతో ప్రీమియర్ డిఫెన్స్ పరిశ్రమ ఏర్పాటుకు చర్యలు వేగవంతమవుతున్నాయి. అలాగే మనుబోలు మండలం మడమనూరు వద్ద శ్యామ్ మెటాలిక్స్ ఎనర్జీ ప్రాజెక్ట్ పనులు పురోగమిస్తున్నాయి. ఇక ఇఫ్కో సెజ్లో టాటా పవర్ రెన్యువబుల్ ఎనర్జీ సంస్థ రూ.6500 కోట్ల పెట్టుబడితో సౌర విద్యుత్ ప్లాంట్ ఏర్పాటు చేయడానికి ముందుకు రావడం జిల్లాకు పెద్ద బూస్ట్గా మారింది. ఈ ప్రాజెక్ట్ ద్వారా వేలాది మంది యువతకు ఉపాధి అవకాశాలు లభించనున్నాయి.
ప్రభుత్వ సంక్షేమ, అభివృద్ధి కార్యక్రమాలను గ్రామ స్థాయిలో సమర్థంగా అమలు చేయాలనే లక్ష్యంతో ‘పల్లె వీక్షణ’ కార్యక్రమాన్ని ప్రారంభించారు. ప్రతి వారం ఒక గ్రామాన్ని సందర్శిస్తూ, అధికారులు కలిసి పథకాల అమలు తీరును పరిశీలిస్తున్నారు. ఉపాధి హామీ పనులు, అంగన్వాడీ కేంద్రాలు, పంట పొలాలు పరిశీలిస్తూ ప్రజలతో నేరుగా మమేకమవుతున్నారు.
వ్యవసాయ రంగంలో ‘ఛాంపియన్ ఫార్మర్స్’ కార్యక్రమం ద్వారా రైతులకు కొత్త దిశను చూపిస్తున్నారు. సుమారు 700 మంది రైతులను ఎంపిక చేసి సహజ వ్యవసాయం, సమగ్ర కీటకనాశక నిర్వహణ వంటి పద్ధతులను ప్రోత్సహిస్తున్నారు. ప్రీ-మాన్సూన్ డ్రై సోయింగ్, మల్టీ క్రాపింగ్ వంటి విధానాలతో రైతులు తక్కువ ఖర్చుతో అధిక దిగుబడులు సాధించేలా మార్గనిర్దేశం చేస్తున్నారు. ఈ కార్యక్రమం ద్వారా పంట నాణ్యత మెరుగుపడటంతో పాటు రైతుల ఆదాయం పెరుగుతోంది.
ఇక ఉద్యోగుల సంక్షేమానికి కూడా పెద్దపీట వేస్తూ, ఎన్నో ఏళ్లుగా పెండింగ్లో ఉన్న పదోన్నతులను వేగవంతంగా అమలు చేస్తున్నారు. కారుణ్య నియామకాల ద్వారా మరణించిన ఉద్యోగుల కుటుంబాలకు ఉపాధి కల్పిస్తున్నారు. ప్రతి నెల మూడవ శనివారం ఉద్యోగుల సమస్యల పరిష్కారానికి ప్రత్యేక గ్రీవెన్స్ డే నిర్వహించడం ద్వారా పరిపాలనలో సమన్వయాన్ని పెంచుతున్నారు.
మొత్తంగా, ప్రజల సంక్షేమం, పారిశ్రామిక అభివృద్ధి, వ్యవసాయ పురోగతి, ఉద్యోగుల సంక్షేమం వంటి అన్ని రంగాల్లో సమగ్ర దృష్టితో ముందుకు సాగుతున్న కలెక్టర్ హిమాన్షు శుక్లా పాలన నెల్లూరు జిల్లాలో సానుకూల మార్పులకు దారితీస్తోందని విశ్లేషకులు అభిప్రాయపడుతున్నారు.