విక్రమ్ ఆచూకీ దొరికింది.. కానీ!

భారత అంతరిక్ష పరిశోధన సంస్థ (ఇస్రో) ప్రతిష్టాత్మకంగా ప్రయోగించిన విక్రమ్ ల్యాండర్ ఆచూకీ ఎట్టకేలకు లభ్యమైంది. చంద్రుడి ఉపరితలంపై ఉన్న విక్రమ్ శిథిలాలను అమెరికా అంతరిక్ష పరిశోధన సంస్థ (నాసా) గుర్తించింది. ల్యాండర్ చంద్రుడి ఉపరితలంపై దిగే క్రమంలో హార్డ్ ల్యాండింగ్ అయిందని, ఫలితంగా అది ముక్కలైపోయిందని పేర్కొంది.

చంద్రయాన్-2లో భాగంగా విక్రమ్ ల్యాండర్.. చంద్రుడి దక్షిణ ధ్రువంపై దిగాల్సి ఉన్న సంగతి తెలిసిందే. ప్రయోగం మొత్తం సాఫీగా సాగినా.. చివరి క్షణంలో తలెత్తిన అనుకోని అవాంతరం వల్ల ల్యాండర్ హార్డ్ ల్యాండింగ్ అయింది. దీంతో విక్రమ్ ల్యాండర్ తో ఇస్రో సంబంధాలు తెగిపోయాయి. దాని ఆచూకీ తెలుసుకోవడానికి విశ్వ ప్రయత్నాలు చేసినా ఫలితం దక్కలేదు.

నాసా సైతం విక్రమ్ ఆచూకీ కోసం ప్రయత్నాలు చేసింది. చంద్రుడిపై దిగిన తర్వాత 14 రోజులపాటు పనిచేసేలా ఆ ల్యాండర్ ను రూపొందించిన నేపథ్యంలో విక్రమ్ తో సంబంధాల పునరుద్ధరణ కోసం శాస్త్రవేత్తలు ఆ 14 రోజులూ తీవ్రంగా ప్రయత్నాలు చేశారు. కానీ ఫలితం కనిపించలేదు. ఈ నేపథ్యంలో ఇక విక్రమ్ ల్యాండర్ గురించి అందరూ మరచిపోయిన తరుణంలో దానిని నాసా గుర్తించింది.

అందుకు సంబంధించి ఫొటోలను ట్విట్టర్ లో షేర్ చేసింది. లూనార్ రిక‌యిన‌సెన్స్ ఆర్బిటార్‌ (ఎల్ఆర్‌వో) తీసిన ఫోటోల్లో విక్ర‌మ్ క‌నిపించింది. అది కూలిన ప్రాంతాన్ని నాసా ఆర్బిటార్ చిత్రీక‌రించింది. ల్యాండర్ శిథిలాలను భార‌తీయ ఇంజనీర్ ష‌ణ్ముగ సుబ్ర‌మ‌ణియ‌న్ గుర్తించిన‌ట్లు నాసా వెల్లడించింది.

వాస్తవానికి విక్రమ్ ల్యాండర్ తో ఇస్రో సంబంధాలు కోల్పోయిన వెంటనే సీనియర్ శాస్త్రవేత్తలందరూ అది హార్డ్ ల్యాండింగ్ అయిందనే అభిప్రాయానికి వచ్చేశారు. అయితే, జాతి మొత్తం ఎంతో ఆసక్తితో ఎదురు చూస్తున్న ప్రయోగం విఫలమైందని చెబితే వారంతా నిరాశపడతారని భావించి, పూర్తి వివరాలు వెల్లడించలేదని సమాచారం.

తాజాగా నాసా ఆ విషయాన్ని వెల్లడిస్తూ ఫొటోలు విడుదల చేయడంతో విక్రమ్ ఏమైందనే విషయం అందరికీ తెలిసింది. గతనెలలో నాసా తీసిన ఆ ఫొటోలను ఆ సంస్థ ఇంకా విశ్లేషిస్తోంది.