హైద్రాబాద్ వేదికగా నరేంద్ర మోడీ డబుల్ ఇంజిన్ నినాదం.!

అసలు డబుల్ ఇంజిన్ అంటే ఏంటి.? దాని వల్ల ప్రయోజనమేంటి.? అన్నదానిపై భిన్న వాదనలున్నాయి. అయినాగానీ, డబుల్ ఇంజిన్.. అంటోంది కేంద్రంలో అధికారంలో వున్న బీజేపీ. డబుల్ ఇంజిన్ సర్కారుతోనే ప్రయోజనమనుకుంటే, మహారాష్ట్రలో అధికార పీఠమెక్కే అవకాశం వచ్చినా, ఎందుకు శివసేన అసమ్మతి ఎమ్మెల్యే, షిండేని ముఖ్యమంత్రి పదవిలో కూర్చోబెట్టినట్లు.?

రాజకీయం అంటేనే అంత.! ప్రధాని నరేంద్ర మోడీ హైద్రాబాద్ వేదికగా డబుల్ ఇంజిన్ సర్కారు.. అంటూ నినదించారు. తెలంగాణలో డబుల్ ఇంజిన్ సర్కారు రావాలన్నది ప్రధాని నరేంద్ర మోడీ ఉవాచ. అంటే, కేంద్రంలోనూ అలాగే రాష్ట్రంలోనూ ఒకే పార్టీ అధికారంలో వుండాలని అర్థం.

రేప్పొద్దున్న కేంద్రంలో కాంగ్రెస్ పార్టీ తిరిగి అధికారంలోకి వస్తే.. అప్పుడు కూడా డబుల్ ఇంజిన్ సర్కారు.. అంటూ, బీజేపీ.. ఆయా రాష్ట్రాల్లో అధికారాన్ని వదులుకుంటుందా.? భారతదేశం రాష్ట్రాల కూటమి. ఔను, కేంద్రం అలాగే రాష్ట్రాల మధ్య పరస్పర సహకారం వుండాలి. అంతే తప్ప, రాష్ట్రాలపై కేంద్రం పెత్తనం వుండకూడదు.

బీజేపీ జాతీయ కార్యవర్గ సమావేశాల కోసం హైద్రాబాద్ వచ్చిన ప్రధాని నరేంద్రమోడీ, హైద్రాబాద్‌లో జరిగిన బహిరంగ సభలో మాట్లాడారు. గ్రేటర్ హైద్రాబాద్ ఎన్నికల్ని ప్రస్తావించారు, తెలంగాణకి కేంద్రం ఏమేం చేసిందో చెప్పుకొచ్చారు. ఏమేం చేయబోతోందో వివరించారు. అంతా బాగానే వుందిగానీ, డబుల్ ఇంజిన్ సర్కారు.. అన్న మాటలోనే ఎక్కడో తేడా వుంది.

దేశంలో అసలంటూ ప్రాంతీయ పార్టీలే వుండకూడదన్నట్టుగా వుంది నరేంద్ర మోడీ ఆలోచన. ఎటూ కాంగ్రెస్ ముక్త భారత్ అయిపోయింది దాదాపుగా. సో, రాష్ట్రాల్లో అయినా.. కేంద్రంలో అయినా, బీజేపీ తప్ప ఇంకో పార్టీనే అధికారంలో వుండకూదనే ఆలోచనతో మోడీ వ్యవహరిస్తున్నారు. దీన్ని ప్రజాస్వామ్యం అనగలమా.? ఏమో, మోడీ ఏం చెబితే అదే నిజం.. ఇప్పుడున్న మీడియాకి కూడా. అదే మోడీ స్వామ్యం.!