నేడే జాతినుద్దేశించి మోడీ ప్రసంగం.. ఈసారేం చెబుతారో.!

కరోనా వైరస్‌ నేపథ్యంలో ఇప్పటికే పలుమార్లు జాతిని ఉద్దేశించి ప్రధాని నరేంద్ర మోడీ ప్రసంగించారు. ‘మీ ఇంటి ముందరే నిలబడి క్లాప్స్‌ కొట్టండి..’ అంటే, జనం తు.చ. తప్పకుండా పాటించారు. ‘మీ ఇంట్లో లైట్లు ఆపేసి కాస్సేపు కొవ్వొత్తుల్ని వెలిగించండి..’ అని మోడీ చెబితే, జనం పాటించారు. 135 కోట్ల మంది భారతీయులూ, కరోనా వైరస్‌ విషయంలో మోడీ చెప్పిన సూచనల మేరకు నడుచుకుంటున్నారన్నది నిర్వివాదాంశం.

ఇంత పెద్ద దేశంలో ఒకరిద్దరు చేసే తప్పులు జాతికి చేటు చేసే అవకాశం లేకపోలేదన్న విషయాన్ని పక్కన పెడితే, అత్యధిక శాతం మంది నరేంద్ర మోడీ చెప్పిన ప్రతి మాటనీ ఫాలో అవుతున్నారు. కానీ, ప్రజలకు కేంద్ర ప్రభుత్వం ఏం చేస్తోంది.? అన్నదే ఇక్కడ మిలియన్‌ డాలర్ల ప్రశ్న.

‘లోన్లు, ఈవీఎంలపై మారటోరియం..’ విషయంలో కేంద్రం ఏదో చెప్పింది, బ్యాంకులు ఇంకోటేదో చేశాయి.. లాక్‌డౌన్‌తో జనం ఆర్థిక ఇబ్బందుల్లో కూరుకుపోతే, బ్యాంకులు వడ్డీల మీద వడ్డీలతో చావగొట్టేస్తున్నాయి. మరోపక్క, కేంద్రం.. రాష్ట్రాలకు ఆర్థిక వెసులుబాట్లు కల్పించడంలేదు.

ఇవన్నీ ఎత్తయితే, 135 కోట్ల మంది భారతీయులు ఓ పద్ధతి ప్రకారం లాక్‌డౌన్‌ సందర్భంలో జీవనం సాగిస్తోంటే, మళ్ళీ మద్యం మహమ్మారిని జనంలోకి బలవంతంగా వదలడమేంటి.? ఇలా చెప్పుకుంటూ పోతే చాలా ఆవేదనాభరితమైన అంశాలున్నాయి ప్రజల మెదళ్ళలో. అయితే, ప్రజల ఆవేదన గుర్తించే స్థితిలో నరేంద్ర మోడీ ఎప్పుడూ వుండరు. అసలు ప్రజల ఆకాంక్షలు ఆయనకి పట్టనే పట్టవు.. అనే విమర్శ లేకపోలేదు.

పబ్లిసిటీ స్టంట్లు తప్ప, నరేంద్ర మోడీ చేసిందేంటి.? క్లిష్ట పరిస్థితుల్లోనూ దేశ ప్రజలతో ‘పబ్లిసిటీ ఆటలు ఆడతారా.?’ అన్న విమర్శలకు నరేంద్ర మోడీ ఏం సమాధానం చెబుతారు.? ముచ్చటగా మూడోసారి లాక్‌డౌన్‌ కొనసాగుతోంది. నాలుగో పొడిగింపు తప్పదా.? లాక్‌డౌన్‌ అంటూనే, సడలింపుల పేర్లతో మద్యం అమ్మకాలకు ఆస్కారమిచ్చిన ప్రధాని నరేంద్ర మోడీ, దేశ ప్రజలకు ఏం సంకేతాలు పంపినట్లు.?

దేశంలో కరోనా విజృంభిస్తున్న వేళ, లాక్‌డౌన్‌పై కేంద్రం తీసుకోబోయే నిర్ణయం, 135 కోట్ల మంది ప్రజలపై ఎలాంటి ప్రభావం చూపనుంది.? ఏదిఏమైనా, జాతిని ఉద్దేశించి మోడీ చేసే ప్రసంగం, దేశ ప్రజలకు భరోసా ఇచ్చేలా వుండాలని ఆశిద్దాం.