జెండా పండుగ.! దేశభక్తి పాఠాలు నేర్పుతున్న ప్రధాని నరేంద్ర మోడీ.!

కోవిడ్ పాండమిక్ సమయంలో, ప్రతి ఒక్కరూ తమ ఇళ్ళలో దీపాల వెలిగించండి.. ఇంట్లోంచి రోడ్ల మీదకు రాకపోయినా.. ఇళ్ళ బాల్కనీల నుంచే క్లాప్స్ కొట్టండి.. వీలైతే, కంచం.. గరిటె పట్టుకుని వాయించండి.. అంటూ అప్పట్లో ప్రధాని నరేంద్ర మోడీ ఇచ్చిన పిలుపు గురించి ఎంత చెప్పుకున్నా తక్కువే.

తాజాగా, ఆజాదీ కా అమృత మహోత్సవ్ వేడుకల నేపథ్యంలో సోషల్ మీడియా ఖాతాల తాలూకు ప్రొఫైల్ పిక్స్, వాట్సాప్ ప్రొఫైల్ పిక్స్ మార్చేయాలనీ, మువ్వన్నెల జెండాని ప్రదర్శించాలనీ ప్రధాని నరేంద్ర మోడీ పిలుపునిచ్చారు. ఇదిప్పుడు దేశవ్యాప్తంగా చర్చనీయాంశమయ్యింది.

130 కోట్ల మంది భారతీయులకు కొత్తగా ప్రధాని నరేంద్ర మోడీ దేశభక్తి పాఠాలు నేర్పుతున్నారా.? అన్న ప్రశ్న ఉత్పన్నం కాకుండా వుంటుందా.? భారతీయులెవరికీ ప్రత్యేకంగా దేశభక్తి గురించి నేర్పించాల్సిన పనిలేదు.. దేశభక్తిని గుర్తు చేయాల్సిన అవసరం అసలే లేదు.

జెండా పండుగ అనగానే.. ఆటోమేటిక్‌గా ప్రొఫైల్, స్టేటస్‌లో మువ్వన్నెల జెండాలతో మెరిసిపోవడం ఇటీవలి కాలంలో సర్వసాధారణమైపోయింది. జాతీయ గీతం ఎక్కడ వినిపించినా దేశభక్తి ఉప్పొంగుతుంటుంది. అది స్వతహాగా ప్రతి భారతీయుడిలోనూ వుండే ప్రత్యేకమైన అనుభూతి.

ఆజాదీ కా అమృత మహోత్సవ్ వేడుకల్లో.. కేంద్ర ప్రభుత్వం చెయ్యాల్సింది వేరే వుంది. దేశాన్ని అవినీతి రహితంగా మార్చుతామని చెప్పగలగాలి. దేశాన్ని కాలుష్య రహితంగా వుంచుతామని చెప్పాలి. చట్ట సభల్లో రాజకీయ నాయకుల అసభ్యకర ప్రవర్తనకు చెక్ పెడతామని చెప్పాలి. దేశాన్ని అప్పుల ఊబిలోకి నెట్టేయబోమని దేశ ప్రజలకు మామీ ఇవ్వగలగాలి. అన్నిటికీ మించి, ప్రజా ధనాన్ని పబ్లిసిటీ కోసం వృధా చేయబోమనీ చెప్పగగలగాలి.

దురదృష్టం.. పాలకుల నుంచి ఇలాంటివేమీ మనం ఆశించలేం. పైగా, ఇదిగో.. ఇలా దేశభక్తి సుద్దులు నేర్పతుంటారు. ప్రతి ఇంటిపైనా జెండా ఎగురవేయాలన్నది కేంద్ర, రాష్ట్ర ప్రభుత్వాలు చేస్తోన్న సూచన. జెండా ఎగరాల్సింది ఇళ్ళ మీదనే కాదు, గుండెల్లో కూడా. పబ్లిసిటీ కోసం జెండాలు ఇళ్ళ మీద ఎగరవేసి, ఆ తర్వాత వాటిని ఎక్కడపడితే అక్కడ పారేస్తే.. ఆ పాపం ఎవరిది.?