ఓటిటి రివ్యూ: నర్తనశాల – బాలకృష్ణ, సౌందర్య, శ్రీహరిలతో పాటు అన్నగారు స్పెషల్ హైలైట్.!

విశ్వా విఖ్యాత నటసార్వభౌమ నందమూరి తారక రామారావు నటించిన అద్భుతమైన సినిమాల్లో నర్తనశాల ఒకటి. నందమూరి బాలకృష్ణ 2004లో ఎంతో మనసుపడి మొదలుపెట్టిన డ్రీమ్ ప్రాజెక్ట్ ‘నర్తనశాల’. అలనాటి నర్తనశాలను మళ్ళీ తిరిగి అందించాలని బాలయ్య అనుకున్నారు. అర్జునుడిగా తాను, ద్రౌపదిగా సౌందర్య, భీముడిగా శ్రీహరి, ధర్మరాజుగా శరత్ బాబును ఎంచుకున్నారు. తానే స్వయంగా నిర్మించి, దర్శకత్వం వహించడం మొదలుపెట్టారు. అయితే ద్రౌపదిగా నటిస్తోన్న సౌందర్య అర్ధాంతరంగా చనిపోవడంతో ఈ సినిమా అక్కడే నిలిచిపోయింది. ఇప్పుడు దాదాపు 16 సంవత్సరాల తర్వాత ఓటిటి ద్వారా బాలకృష్ణ తను నర్తనశాల కోసం తీసిన 16 నిమిషాల ఫుటేజ్ ని రిలీజ్ చేశారు.

కథలోకి వెళితే..

12 సంవత్సరాలు అరణ్యవాసం చేసిన పాండు కుమారులు అలియాస్ పాండవులు అరణ్యవాసం చివరి రోజు తమ అజ్ఞాతవాసం ఎలా పూర్తి చెయ్యాలి? ఎక్కడైతే తమరికి సురక్షితంగా ఉంటుంది? ఎవరెలాంటి వేశాల్లోకి మారాలని అని చాడ్చించుకోవడమే ఈ 16 నిమిషాల కథ..

నటీనటుల ప్రతిభ..

అర్జునుడిగా బాలకృష్ణ, ద్రౌపదిగా సౌందర్య, భీముడిగా శ్రీహరి, ధర్మరాజుగా శరత్ బాబులు పాత్రలకు పర్ఫెక్ట్ గా సరిపోయారు. అలాగే మధ్యలో బాలయ్య ధర్మరాజు గొప్పతనం గురించి చెప్పే పౌరాణిక డైలాగ్ చూసే అభిమానులకు వారెవ్వా అనేలా చేస్తుంది. దాదాపు 16 ఏళ్ళ తర్వాత సౌందర్య గారి విజువల్స్, ఆమె కనిపించిన రెండు సీన్స్ కన్నుల విందుగా అనిపిస్తుంది. భీముడిగా శ్రీహరి చేసిన సీన్ చూసాక, ఆయన చేసిన పాత్రలన్నీ కళ్ళముందు కదిలేలా చేస్తుంది. శరత్ కుమార్ కూడా బాగా చేశారు. ఈ 16 నిమిషాల ఫుటేజ్ లో దాదాపు 6 నిమిషాల ఫుటేజ్ అన్నగారైన నందమూరి తారకరామారావు నటించిన నర్తనశాల లోని ఫుటేజ్ ని వాడారు. ఒకేసారి అన్నగారిని కూడా చూడడం బాగా అనిపిస్తుంది. అలాగే చివర్లో టాప్ హీరో’ మూవీ లోని సామజవరాగమన సాంగ్ లోని ‘బాలయ్య – బృహన్నల’ డాన్స్ బిట్ తో ముగింపు ఇవ్వడం సడన్ గా జోష్ తెప్పిస్తుంది.

సాంకేతిక విభాగం..

మొదటిసారి నందమూరి బాలకృష్ణ చేసిన దర్శకత్వం పరవాలేధనిపిస్తుంది. పలువురు నటీనటులు లేకపోయినా వాళ్ళకి సింక్ అయ్యేలా డబ్బింగ్ చెప్పించడం చాలా బాగుంది.

విశ్లేషణ..

ఎన్.బి.కె నర్తనశాల అని రిలీజ్ చేసిన ఈ 16 నిమిషాల కంటెంట్ లో ఒరిజినల్ కంటెంట్ తక్కువ ఉండడం వలన, అన్నగారి నర్తనశాల నుంచి 6 నిమిషాలు యాడ్ చేసి ఆసక్తిగానే కట్ చేసారు. నందమూరి అభిమానులు చూస్తున్నంత సేపు మంచి ఫీల్ కి లోనవుతారు. మిగిలినవారు కూడా మన మధ్య లేని నటుల కోసం చూడచ్చు.

చూడాలా?? వద్దా??: రూ.60 సమస్య కాదనుకుంటే హ్యాపీగా చూడచ్చు.

గమనిక: ఇది పూర్తి సినిమా కాదు, 16 నిమిషాల ఫుటేజ్ మాత్రమే.. అందుకే మేము ఎలాంటి రేటింగ్ ఇవ్వడం లేదు.